विद्यालय कर्मचारीहरुको माग तत्काल सम्बोधन गर्न सांसद पौडेलको माग

८ असार, काठमामाडौं । सत्तारुढ नेकपा (माओवादी केन्द्र)का सांसद देवेन्द्र पौडेलले विद्यालय कर्मचारीहरुको समस्या तत्काल समाधान गर्न सरकारसँग माग गरेका छन् ।

सार्वजनिक विद्यालय सुधार अभियानलाई सार्थक बनाउन पनि विद्यालय कर्मचारी र शिक्षकहरुसँग विगतमा गरिएका सहमतिहरु कार्यान्वयन सरकारले ढिलाई गर्न नहुने उनले बताए । समस्या समाधानमा ढिलाई भएकोमा उनले गुनासो गरे ।

‘विद्यालय सुधार्नका निम्ति महत्वपूर्ण जिम्मेवारी प्राप्त गरेका शिक्षकहरुलाई सम्मानित गरेर, शिक्षकका मागहरु सुधार गरेर, विद्यालय कर्मचारीका समस्याहरु समाधान गरेर सार्वजनिक विद्यालय सुधार अभियानमा अगाडि बढन नेपाल सरकार र सम्बन्धित निकायलाई गम्भिर ध्यानाकर्षण चाहन्छु’ शुक्रबार प्रतिनिधिसभाको बैठकमा पूर्वमन्त्री समेत रहेका सांसद पौडेलले भने । 

विद्यालयका कर्मचारीहरुले लेखापाल र कार्यालयका सहयोगीको सेवा सुविधा खरदार सरह पुर्‍याउन माग गर्दै आइरहेका छन् । सरकारले आगामी आवका लागि लिएको नीति तथा कार्यक्रममा पनि सेवा सुविधामा वृद्धि गर्ने उल्लेख गरेको छ । तर बजेटमा सो कुरा नसमेटिएपछि कर्मचारीहरु आन्दोलनमा छन् ।