शान्ति सुरक्षालाई ध्यानमा राखेरै सेनालाई निर्माणमा लगाइएको छ :  रक्षामन्त्री

​​​​​​११ असार, काठमाडौं । उपप्रधान एवं रक्षामन्त्री पूर्णबहादुर खडकाले नेपाली सेनालाई मुलुकको शान्ति सुरक्षालाई कायमै राखेर सेनालाई निर्माणका काममा खटाइएको बताएका छन् । मन्त्रालयको विनियोजन विधेयकमाथि छलफलमा सांसदहरुले सेना परिचालन र संख्याबारे उठाएका प्रश्नको जवाफ दिँदै मन्त्री खडकाले सेनालाई शान्ति सुरक्षाको अवस्थालाई विश्लेषण र भरपर्दो बनाएरै निर्माण ठेक्कामा लगाइएको बताए । 

काठमाडौं–तराई फाष्ट ट्रयाक (द्रूत मार्ग)को निर्माणको ठेक्का नेपाली सेनालाई दिइएको छ । त्यसमा सेना निश्चित संख्या परिचालित छन् । छिमेकी मुलुकले देशको सीमा मिचेर अतिक्रमण गरिरहेको बेला सेनालाई सीमा सुरक्षामा नखटाई ठेक्कामा किन लगाएको ? भन्ने सांसदहरुको प्रश्नमा मन्त्री खडकाले नेपाली सेनाको विद्यमान कानून र नियमको परिधिभित्रै रहेर ठेक्काको काममा लागेको बताए । 

यसअघिका बैठकमा सांसद पूर्णबहादुर तामाङले नेपाली सेनालाई ठेक्का पट्टामा लगाउनु गलत रहेको बताएका थिए । उनले सेनाले ६ अर्ब रुपैयाँमा आफ्नो हेडक्वाटर जंगी अड्डा टेण्डरबिना बनाएको भन्दै आलोचना गरेका थिए । उनले टेण्डरमा बनाउन दिए करोडौं रुपैयाँ लागत कम पर्ने थियाे भन्ने उनको तर्क थियो । 

जवाफ दिने क्रममा मन्त्री खण्डकाले नेपाली सेनाको तलब र भत्ता कम भएपनि आउने आर्थिक वर्षमा वृद्धि नगर्ने योजना सरकारको रहेको बताए । साथै सेनालाई शान्ति मिसनमा खटाउने संख्या वार्षिक १० हजार पुर्याउने योजना सरकारले लिएको बताए । यसबारे संयुक्त राष्ट्र संघका प्रतिनिधिसँग छलफल गरिने बताए । हाल वार्षिक ६ हजार सेना शान्ति मिसनमा जाने गरेका छन् । 

सेनाको संख्या घटनाउनुपर्ने भनी सांसदहरुले उठाएको प्रश्नमा संख्या हेरफेर गर्ने अवस्था अहिले नरहेको र रासनमा सुधार गरेर जाने पक्षमा सरकार रहेको बताए ।