कांग्रेसको सदस्यता फारम अब अनलाइनबाट भर्न मिल्ने, सदस्यता प्राप्त गर्नका लागि ताेकियाे २० रुपैयाँ

११ असार, काठमाडौं । नेपाली कांग्रेसको सदस्यता फारम अब अनलाइनबाट भर्न मिल्ने भएको छ । कांग्रेसले सदस्यता वितरणलाई सहज बनाउन पार्टीको वेबसाइटमा गएर सदस्यता फारम भर्न मिल्ने व्यवस्था गर्न लागेको हो । 

नेपाली कांग्रेसका केन्द्रीय सदस्य तथा प्रचार विभाग प्रमुख मीन बिश्वकर्माले नेपालबहसलाई दिएको जानकारी अनुसार सूचना जारी गरेर अनलाइनबाटै कांग्रेसको सदस्यता खुला गरिने तयारी भइरहेको छ । 

प्रचार विभाग प्रमुख बिश्वकर्माका अनुसार पार्टीको संगठन संरचना, सदस्यता वितरण र व्यवस्थापनलाई व्यवस्थित बनाउने काम भइरहेको अब पार्टीको छिट्टै बस्ने बैठकले अनलाइनबाटै सदस्यता फारम र सदस्यता वितरण खुला गर्न निर्णय लिने छ । 

नेपालबहससँगको कुराकानीका प्रचार विभाग प्रमुख बिश्वकर्माले भने, ‘अहिले हामी आन्तरिक तयारी गर्दैछौं । पार्टीको अब बस्ने बैठकपछि अनलाइनबाटै सदस्यता फारम भर्न मिल्ने सबै बनाउँछौं,’ उनले भने । अगाडि कुराकानीमै उनले भने, अहिले सिस्टम अपडेट लगायतका कामहरू जारी छ, फारम भने अपडेट भएको छैन । बैठक बसेर निर्णय भएपछि अनलाइन फारम अपडेट हुने छ । 

कांग्रेसको क्रियाशील सदस्यता नवीकरणका लागि केही जिल्लाका क्षेत्रहरूमा फारमसमेत पठाइ सकिएको छ । अनलाइनबाट भरेको फारम वडादेखि केन्द्रसम्मका ७ तहमध्ये पार्टीको कुनै एक तह समितिले स्वीकार्छ र सदस्यता दिन्छ । वडा, गाउँपालिका, प्रदेश र संघ क्षेत्रीय समिति, जिल्ला कार्यसमिति, प्रदेश र केन्द्रीय कार्यसमिति गरी सात तहमा संगठन संरचना छ ।

कांग्रेसको विधानमा साधारण क्रियाशील गरि दुई प्रकारका सदस्यता वितरण हुने व्यवस्था छ । साधारण सदस्यता वितरण गरिने विगतमा प्रचलन थिएन । साधारण सदस्यता प्राप्त गरेको व्यक्तिले एकवर्ष पछि क्रियाशील सदस्यता पाउने विधानको प्रावधान छ ।

काग्रेसको सदस्यता लिनको लागि पार्टीको साइटमा उपलब्ध गराइएको फर्म भर्नुपर्ने हुन्छ । सदस्यता प्राप्त गर्नका लागि नाम, जन्ममिति, इमेल आइडी, मोबाइल नम्बर, राष्ट्रिय परिचयपत्र नम्बर, ठेगाना, ब्लड ग्रुप, भाषा, पेशा प्रदेश, जिल्ला लगायतको विवरण भर्नुपर्दछ ।

साथै, पासपोर्ट आकारको तस्वीर, नागरिकताको अघिल्लो भाग र पछाडीको फोटो पनि अपलोड गर्नुपर्ने हुन्छ । सदस्यता प्राप्त गर्नका लागि २० रुपैयाँ तोकिएको छ ।

२०७८ मंसिरमा भएको १४ औं महाधिवेशनका बेला कांग्रेसमा ८ लाख ४६ हजार ७ सय २९ जना क्रियाशील सदस्य थिए ।