बिजुली नेपालीलाई पुर्याएर मात्र विदेशमा बिक्री : ऊर्जामन्त्री बस्नेत

११ असार, काठमाडौं । ऊर्जा, जलस्रोत तथा सिंचाई मन्त्री शक्तिबहादुर बस्नेतले बिजुली नेपालीलाई पुर्याएर मात्र विदेशमा बिक्री गरिने बताएका छन् । सांसदहरुले उठाएको प्रश्नको सोमबार प्रतिनिधिसभाको बैठकमा जवाफ दिँदै मन्त्री बस्नेतले नेपालभित्र खपत हुनेसम्म बिजुली विदेशमा निर्यातत नगरिने स्पष्ट पारेका हुन् । 

उनले प्रधानमन्त्री प्रचण्डको भारत भ्रमणका क्रममा नेपालले भारतलाई बिजुली बिक्री गर्ने सम्झौताबारे जानकारी दिँदै सरकार र नीजि क्षेत्रबाट गरिने उत्पादित बिजुली हरेक नेपालीसम्म पुर्याउने र बाँकी रहेकालाई मात्र निर्यात गरिने बताए । 

अहिले सबै नागरिकको बसोबास स्थानसम्म बिजुली पुर्याउन प्रसारण लाइन बनाउने काम भइरहेको र बजेटको अभावले काम पूरा हुन केही वर्ष लाग्ने उनले बताए । प्रसारण लाइन निर्माणभन्दा पहिल्यै धेरै मात्रामा बिजुली उत्पादन हुने अवस्था रहेको र यसबीच बिजुली खेर जान नदिन क्रमिक रुपले निर्यात गर्ने नीति सरकारले लिएको बताए ।

मन्त्री बस्नेतले सिंचाईका लागि मुहान उप्लब्ध नहुने स्थानमा लिफ्टबाट समेत पानी पुर्याएर खेती गर्न नर् सिंचाईमा कमी हुन नदिने आश्वसन दिए । साथै ऊर्जाका लागि देशमा जलस्रोत प्रशस्त मात्रामा रहेको र यसलाई सतशतप्रति उपयोग गर्ने नीति सरकारले लिएको बताए ।