नागरिक उड्ड्यन प्राधिकरणका महानिर्देशकलाई मन्त्री किरातीको स्पष्टीकरणपत्र

१२ असार, काठमाडौं । संस्कृति, पर्यटन तथा नागरिक उड्डयन मन्त्रीसुदन किरातीले नेपाल नागरिक उड्ड्यन प्राधिकरणका महानिर्देशक प्रदीप अधिकारीलाई स्पष्टीकरण सोधेका छन् ।

उनीमाथि उड्डयन सुरक्षा बलियो र प्रभावकारी बनाउन नसकेको, उडान सुरक्षामा लापरबाही गरेको लगायत राज्यले सुम्पेको जिम्मेवारी बहन गर्न नसकेको विषयमा ९ बुँदे स्पष्टीकरण सोधेका हुन् । 

अधिकारीमाथि प्राधिकरणको नेतृत्वमा रहेर प्राधिकरणलाई नियामक र सेवा प्रदायक निकायका रुपमा अलग गर्ने सररकारको नीतिविरुद्ध काम गरेको र अभिव्यक्ति दिइएको आरोप छ । 

भैरहवा र पोखरामा अन्तर्राष्ट्रिय विमानस्थलमा नियमित उडान सञ्चालन गर्न असहयोग गर्नुका साथै यसअघि दिइएका निर्देशनहरु पालना नगरेका जस्ता विषयमा मन्त्री किरातीले ‘विमानस्थल सञ्चालकको समेत मुख्य भूमिकामा रहनुभएका तपाईंको कार्य क्षमता कमजोर रहेको किन नमान्ने ?’ जस्ता प्रश्न गरेका छन् । 

अधिकारीलाई यसअघि नेपाल वायु सेवा निगम संचालक समितिको बैठकमा मन्त्री किरातीले तोकिएको जिम्मेवारी पूरा नसके समयमै राजीनामा दिएर बाटो खुला गर्न आग्रह गरेका थिए । तैपनि अधिकारी पदमा बसिरहेका छन् ।