जिल्ला निर्वाचन कार्यालय नहटाउने मुद्दामा हामी विपक्षीसँगै छौं : कांग्रेस प्रमुख सचेतक

१२ असार, काठमाडौं । सरकारका मुख्य घटक नेपाली कांग्रेसका प्रमुख सचेतक रमेश लेखकले जिल्ला निर्वाचन कार्यालय खारेज नगर्ने पक्षमा रहेको बताएका छन् ।

मंगलबार प्रतिनिधिसभाको बैठक सुरुलगत्तै विपक्षी दलका सांसदहरुले कार्यालय खारेज गर्ने सरकारले निर्णय फिर्ता लिन माग गर्दै बैठक अवरुद्ध गरेपछि लेखकले नेपाली कांग्रेस पनि कार्यालय खारेज गर्न नहुने पक्षमा अडिग रहेको बताए । खारेजीविरुद्धको मुद्दामा कांग्रेस विपक्षी दलहरुसँगै रहेको बताए ।

विपक्षी दल एमालेका प्रमुख सचेतक पदम गिरी, सांसद सूर्य थापा, रास्वपाका संसदीय दलका नेता रबि लामिछाने र प्रमुख सचेतक सन्तोष परियारले जिल्ला निर्वाचन खारेज गरी सीडीओ कार्यालयभित्र ईकाइ राखेर निर्वाचन कार्यक्रम संचालन गर्ने भनी अर्थमन्त्री डा. प्रकाशशरण महतले बजेटमा घोषणा गरेकाे खारेजी निर्णय फिर्ताको माग गरेका थिए ।

माग गर्दै कुर्सीबाट उठेर बैठक सुरुवाती चरणमै अवरुद्ध पारेपछि सत्ता पक्षका ठूला दल कांग्रेसका प्रसे लेखकले निर्वाचन आयोगले बोलाएको बैठकमा आफूले कार्यालय खारेज नगर्ने निर्णयमा हस्ताक्षर गरेको स्मरण गराउँदै बैठक चल्ने दिनुपर्ने बताए । आफूले कार्यालय खारेज गरी जिप्रकामा गाभ्न नहुने विषयमा अर्थमन्त्री महतसँग भइसकेको र त्यही लाइनमा बैठकमा मन्त्री महतले जवाफ दिने बताए ।

कांग्रेस जिल्ला निर्वाचन कार्यालय खारेज गर्ने पक्षमा कदापि उभिन नसक्ने विषयमा विपक्षी दलहरुसँगै रहेको प्रतिबद्धता जनाए । विपक्षी सांसदहरूकाे विराेधका कारण सभामुख देवराज घिमिरेले १५ मिनेटका लागि स्थगित गरेका बैठक अहिले सुचारू भएको छ ।