अछामका विद्यार्थीलाई दिवा खाजा सरकारले नै खुवाउने, सेनिटरी प्याड वितरण गर्न निर्देशिका ल्याइँदै

१२ असार, काठमाडौं । अछाम जिल्लाका सामुदायिक विद्यालयका विद्यार्थीलाई दिवा खाजा सरकारले नै खुवाउने भएको छ । मंगलबार प्रतिनिधिसभाको बैठकमा शिक्षा, विज्ञान तथा प्रविधि मन्त्री अशोकुमार राईले सांसदहरुले मन्त्रालयमाथिको आगामी आवका लागि विनियोजित बजेटमाथि उठाएका प्रश्नको जवाफ दिने क्रममा यस्तो जानकारी दिएका हुन् ।

अछाममा हालसम्म विश्व खाद्य कार्यक्रमअन्तर्गत वस्तुगत रुपमा उप्लब्ध गराइने सहयोग रकममार्फत दिवा खाजा संचालन गर्दै आइरहेको थियो । मन्त्री राईले आउँदो आर्थिक वर्ष २०८०/८१ बाट सरकार आफ्नै बजेटबाट दिवा खाजा खुवाउने व्यवस्था गरिएको जानकारी दिए । 

साथै मन्त्री राईले देशभरका सामुदायिक विद्यालयमा खुवाइने दिवा खाजामा स्थानीय स्तरमा उत्पादित र उप्लब्ध हुने कृषि उपज प्रयोग गर्न जोड दिइएको बताए । यसनिम्ति स्थानीय तहसँग सहकार्य गर्ने नीति लिएको बताए । 

साथै सामुदायिक विद्यालयमा निःशुल्क रुपमा वितरण गरिँदै आएको छात्राहरुलाई स्यानेटरी प्याड सुव्यस्थित र लक्षित ठाउँमा पु्र्याउन सरकारले निर्देशिका ल्याउने तयारी गरिरहेको जानकारी दिए । यसअघि भएका मन्त्रालयमाथिको विनियोजित बजेट शीर्षक छलफलमा सांसदहरुले छात्राहलाई वितरण गरिने स्यानेटरी प्याड कम गुणस्तरका रहेको र बिचौलियाले बजारमा बिक्री गरेको भन्दै प्रश्न उठाएका थिए ।

उनले हाल मुलुकको साक्षरता प्रतिशत ७६ प्रतिशत रहेको ३६३ स्थानीय तह साक्षरताको सूचीमा रहेको जानकारी दिए । 

यही असार मसान्तभित्र कर्णाली र मधेश प्रदेशका १७२ तहले साक्षर घोषणा गर्ने तयारी गरिरहेको बताए । विद्यार्थीलाई ‘पढ्दै, सिक्दै’, ‘पढ्दै कमाउँदै’ नारालाई व्यवहारमा उतार्ने योजना कार्यान्वयनमा लैजाने तयारी भइरहेको बताए ।