झापाको दमकमा भट्टराई छोरीबुहारी सञ्जालले मनायो राष्ट्रिय धान दिवस

१५ असार, काठमाडौं । भट्टराई कुलबंश प्रतिष्ठान महिला विभाग अन्तर्गत छोरी बुहारी सञ्जाल दमक नगर समितिले सामूहिक रुपमा रोपाइँ गर्दै राष्ट्रिय धान दिवस मनाएको छ । कृषि प्रधान देश नेपालमा असारको १५ गतेलाई अत्यन्तै महत्वका साथ हेर्ने गरिन्छ । मानो खाएर मुरी उब्जाउने असार र कृषि दुबै नेपालको लागि अत्यन्तै महत्वपूर्ण महिना पनि हो ।

देशको राष्ट्रिय आम्दानीको झण्डै ६५ प्रतिशत ओगटेको कृषिलाई अझबढी प्रभावकारी बनाउदै आधुनिक कृषि प्रणालीमा जोडन भट्टराई कुलबंश प्रतिष्ठान छोरीबुहारी सञ्जाल दमक नगर समितिले अत्यन्तै प्रभावकारी कार्यक्रमहरू सञ्चालन गर्दै आइरहेको भट्टराई कुलबंश प्रतिष्ठानका केन्द्रीय अध्यक्ष शेरबहादुर भट्टराईले नेपालबहस डटकमलाई बताएका छन् । 

दमकमा छुट्टै पहिचान बनाउन सफल बन्दै गएको छोरीबुहारी सञ्जालले पारिवारिक एकता र सामाजिक सद्‌भाव जगेर्नामा समेत अतुलनीय सहयोग गर्दै आईरहेको छोरीबुहारी सञ्जालकि दमक नगर समितिका अध्यक्ष गंगा भट्टराईले बताएकी छन् ।

भट्टराई कुलबंश प्रतिष्ठान महिला विभाग अन्तर्गत छोरी बुहारी सञ्जालकी दमक नगर समितिका अध्यक्ष गंगा भट्टराईको अध्यक्षतामा सम्पन्न राष्ट्रिय धान दिवसमा प्रमुख अतिथि दमक नगर पालिकाकी उपप्रमुख रेगिना भट्टराई प्रसाईं, विशिष्ट अतिथि भट्टराई कुलबंश प्रतिष्ठानका केन्द्रीय अध्यक्ष शेरबहादुर भट्टराई, केन्द्रीय उपाध्यक्ष कृतिका भट्टराई, केन्द्रीय सचिव जिवराज भट्टराई, केन्द्रीय सदस्यहरु, जिल्ला सदस्यहरु, छोरीबुहारी सञ्जाल दमक नगर समितिका छोरीबुहारीहरु, छरछिमेकीहरु, लगायतको उपस्थिति रहेको सञ्जालकी नगर सहसचिव कबिता भट्टराईले बताएकी छन् ।

राष्ट्रिय धान दिवस कार्यक्रमकि संयोजक ज्योति भट्टराईको संयोजनमा सम्पन्न भएको कार्यक्रममा भट्टराई कुलबंश प्रतिष्ठानका दमक नगर अध्यक्ष बुद्धिशेखर भट्टराईले सहजिकरण गरेको थियाे । पञ्चैवाजा सहित मनाईएको राष्ट्रिय धान दिवसले नेपाली परम्परा र राष्ट्रिय एकताको झल्को दिएको देखिन्छ । दमक २ स्थित जयनारायण भट्टराईको खेतमा सामुहिक रुपमा दही चिउरा खाएर असार १५ लाई हर्सोल्लासपुर्ण रुपमा मनाईएको छ ।