किसानका मेहनतकै कारण नेपाल नाकाबन्दीमा पनि गलेन : अध्यक्ष ओली

१५ असार, काठमाडौं । प्रमुख प्रतिपक्षी नेकपा (एमाले)का अध्यक्ष केपी शर्मा ओलीले नेपाल कृषि प्रधान देश भएकाले विदेशी गर्ने नाकाबन्दीका बेला जनता भोकै नपरेको बताएका छन् । 

चितवनमा आज राष्ट्रय धान दिवसको अवसरमा आयोजित कार्यक्रममा धारणा राख्दै कृषि मुख्य पेशा भएकै कारण भारतले लगाएको पटकपटकको नाकाबन्दीका बेला पनि नेपालीलाई गलाउन नसकेको बताए । 

ओली धान दिवस मनाउन पत्नी राधिका शाक्यसहित बिहीबार चितवन पुगेका थिए । उनले कृषिलाई सरकारले महत्व दिनु हिच्किचाउन नहुने भन्दै किसान मजबुत हुँदा नेपाल खानाकै लागि कसैसँग मागिरहनु नपर्ने बताए । किसानकै मेहनतले मुलुकमा भोकमरीको संकट टरेको उनको भनाइ थियो ।

‘हामीविरुद्ध पाँच महिना नाकाबन्दी लाग्यो । पाँच महिना नाकाबन्दी लाग्दा पनि नेपाल किन टिक्यो भने यो कृषिप्रधान देश हो’ उनले भने । कृषिप्रधान मुलुक भएर पनि अझै खाद्यन्न विदेशबाट ल्याउनुपर्ने अवस्था हट्न नसकेको भन्दै एमालेको सरकार मात्र यसलाई रोक्ने बताए । 

उनले एमाले नेतृत्वका सरकार पालामा माछा, मासु, अण्डामा धेरै हदसम्म आत्मनिर्भरताको बाटो गएको बताउँदै वर्तमान सरकारले त्यसलाई पछ्याउन नमान्दा व्यापार घाटा र वैदेशिक ऋण बढेको बताए । 

सरकारले हरेक वर्ष असार १५ मा धान दिवस मनाउँदै आएको छ । हरेक सरकारले कृषिमा महत्वसाथ बजेट विनियोजन पनि गर्दै आएको छ । तर वार्षिक रुपमा ४० अर्ब रुपैयाँभन्दा बढी मूल्यको चामल आयात गरेको सरकारी तथ्यांकले देखाएको छ ।