अर्घाखाँचीमा भारी वर्षापछि पहिरो, घर पुरिँदा ३ बालबालिकाको मृत्यु

१९ असार, काठमाडौं । भारी वर्षपछि गएको पहिरोमा पुरिएर अर्घाखाँचीमा ३ बलबालिकाकाे ज्यान गएको छ । पाणिनी गाउँपालिका-१ काे गोवनपानीमा मंगलबार बिहान पहिरोले घर पुरिँदा ३ जना बालबालिकाको मृत्यु भएको छ । आज बिहान ६ बजे घरमाथिको ढिस्को भत्किएर गंगा रास्कोटीको घर पुरिएको हो । 

मृत्यु हुनेमा गंगाकी ११ वर्षकी अञ्जना रास्कोटी, १० वर्षका खुमबहादुर रास्कोटी र ९ वर्षका धनबहादुर रास्कोटी रहेका छन् । १४ वर्षका सचिन्द्र रास्कोटी भने गम्भीर घाइते अवस्थामा उद्धार गरिएको छ । 

सुतिरहेका समयमा घर पुरिएका कारण घटनास्थलमै बालबालिकाको ज्यान गएको हो । घाइते रचिन्द्रलाई उपचारका लागि जिल्ला अस्पताल लगिएको छ । मृतक बालबालिकाको शव पोखराथोकस्थित स्वास्थ्य केन्द्रमा राखिएकोर पोस्टमार्टमपछि परिवारलाई बुझाइने गाउँपालिका अध्यक्ष टेकराज न्यौपानेले बताए ।