बङ्गुर फर्म संचालक ‘नक्कली नोट’ कारोबारमा संलग्न

१९ असार, काठमाडौं । ललितपुरको छम्पिमा बंगुर फर्म चलाउँदै आइरहेका मकवानपुरका प्रशान्त भनिने पासाङ भोम्जन तामाङ नक्कली नोट कारोबारीको आरोपमा पक्राउ परेका छन् ।

विशेष सूचनाका आधारमा उपत्यका अपराध अनुसन्धान कार्यालयबाट खटिएको टोलीले असार १५ मा पासाङलाई पक्राउ गरेको थियो । उनको साथबाट ५ सय दरका ८० हजार नक्कली नेपाली रुपैयाँ बरामद भएको थियो । उनी १५ वर्ष कतार बसेर आएको खुलेको छ । 

प्रहरीलाई उनले ललितपुरको इमाडोलमा बस्दै आएको बताएपछि कोठा तलासी लिँदा एक थान विस्ताराबाहेक केही फेला पार्न सकेनन् । तर उनकी पत्नी प्रहरीको सम्पर्कमा आउँदा मात्र चापागाउँमा घर रहेको खुलेको छ । इमाडोलका कोठा देखावटी रहेको प्रहरीको दाबी छ । 

 लामो समयदेखि अवैध धन्दामा संलग्न रहेको आशंकामा प्रहरीले अनुसन्धान जारी राखेको छ । तामाङले ठूला दरका नेपाली नक्कली नोट देशबाहिरबाट ल्याउने र नेपालका बजारमा पुर्याउने धन्दा गर्दै आइरहेको पाइएको छ । 

यसपटक उनी ८० हजार नक्कली नोट ३५ हजारमा बेच्न खोज्दा वीरगन्जबाट पक्राउ परेका हुन् । पछिल्लो समय उपत्यकामा नक्कली नोटको कारोबार बढ्न थालेसँगै प्रहरीले निगरानी बढाउँदै लगेको छ । मकवानपुरको गढी नगरपालिका–१ का बासिन्दा तामाङले दोस्रो विहेपछि दुई सन्तान रहेको समेत खुलेको छ ।