एसईईको नतिजा सार्वजनिक, ३.६ देखि ४ जीपीए ल्याउनेको संख्या २२,४७५

२१ असार, काममाडौं । माध्यमिक शिक्षा परीक्षा (एसईई) २०७९ को नतिजा प्रकाशित भएको छ । राष्ट्रिय परीक्षा बोर्डअन्तर्गत मावि परीक्षा नियन्त्रण कार्यालय सानो ठिमीले केहीबेर अघिमात्र पत्रकार सम्मेलन गरी नतिजा सार्वजनिक गरेको हो । 

जसअनुसार २२ हजार ४ सय ७५ परीक्षार्थीले ३ दशमलब ४ जीपीए ल्याएका छन् । जुन कुल परीक्षार्थीको २.९ प्रतिशत रहेको बोर्डले बिहीबार पत्रकार सम्मेलन गरी जानकारी दिएको छ । यो संख्या गत वर्ष ९ हजारको हाराहारीमा थियो ।

त्यस्तै ३.२ देखि ३.६ जीपीए ल्याउनेको संख्या ५५ हजार ६९ र २.८ देखि ३.२ जीपीए ल्याउनेको संख्या ७२ हजार ३६२, २.४ देखि २. ८ जीपीए ल्याउनेको संख्या ८९ हजार ३३१ जना रहेको जानकारी दिइयाे । सबैभन्दा धेरै २ देखि २.४ जीपीए ल्याउने विद्यार्थी छन् । उनीहरुको संख्या १ लाख २ हजार २९३ रहेकाे छ ।

यस्तै, ४३१ परीक्षार्थीको परीक्षा रद्द भएकाे छ भने २९० जनाको परीक्षा स्थगित भएकाे जानकारी दिइएकाे छ  । नतिजा बोर्डको वेभसाइटमा हेर्न सकिने जनाइएको छ । साथै पूरक परीक्षा साउन अन्तिम सातादेखि संचालन गरिने पनि पत्रकार सम्मेलनमा जानकारी दिए । 

गत वर्षको तुलनामा यो वर्ष नतिजामा सुधार आएको बोर्डका अध्यक्ष डा. महाश्रम शर्माले पत्रकार सम्मेलन बताए ।

गत चैत्र १७ गतेदेख २९ सम्म संचालन गरिएको एसईई परीक्षामा कुल ४ लाख ८४ हजार ९ सय ३९ परीक्षा सहभागी थिए ।