बन्दी प्रत्यक्षीकरणको रिट निवेदन डा. भट्टराई र फुयाँलको इजलासमा

२२ असार, काठमाडौं । ललितानिवास जग्गा प्रकरणमा प्रहरीको हिरासतमा रहेका मीनबहादुर गुरुङ, सुधीरकुमार शाह र धर्मप्रसाद गौतमले दिएको बन्दी प्रत्यक्षीकरणसम्बन्धी रिट निवेदनमा सुनुवाइका लागि पेसी तोकिएको छ ।

शुक्रबार सर्वोच्च अदालतका न्यायाधीश द्वय डा. आनन्दमोहन भट्टराई र हरिप्रसाद फुयाँलको संयुक्त इजलाशमा उक्त रिट निवेदनमाथि सुनुवाइका लागि पेसी तोकिएको हो । बिहीबार उक्त रिट हेर्न नमिल्नेमा राखिएको थियो । न्यायाधीश रेग्मी कुनै बेला रिट निवेदन मीनबहादुरका निजी कानुन व्यवसायी रहेका कारण हेर्न नमिल्ने भन्दै सुनुवाइ गरिएन ।
 
गत शुक्रबार सोही रिट निवेदनमाथि न्यायाधीश डा. कुमार चुडालको एकल इजलाशमा सुनुवाइ हुँदा कारण देखाऊ आदेश जारी भएको थियो । इजलाशले निवेदकको माग बमोजिम बन्दीप्रत्यक्षीकरणको आदेश किन जारी गर्नु नपर्ने हो भन्ने सन्दर्भमा मनासिव आधार, कारण र प्रमाण भए सो समेत खुलाई बाटोको म्याद बाहेक २४ घण्टाभित्र लिखित जवाफ पेस गर्न गृह मन्त्रालयलाई आदेश दिएको थियो ।