मीनबहादुर गुरुङसहित थुनुवाहरुको बन्दीप्रत्यक्षीकरण रिटमाथि सुनुवाइ सकियो

२२ असार, काठमाडौं । प्रधानमन्त्रीको सरकारी निवास बालुवाटारस्थित सरकार स्वामितत्वको १४३ रोपनी जग्गा हिनामिनामा पक्राउ परी हिरासतमा रहेका ३ अरोपीको बन्दी प्रत्यक्षीकरण रिटमाथि सर्वोच्च अदालतमा संयुक्त इजलासमा सुनुवाइ सकिएको छ । सुनुवाइ न्यायाधीशद्वय आनन्दमोहन भट्टराई र हरिप्रसाद फुयाँलको इजलासमा भएको हो ।

आफूहरुलाई गैरकानूनी तवरले पक्राउ गरी गैरन्यायिक हिरासतमा राखेको भन्दै थुनामुक्तका लागि माग गर्दै असार १३ मा वारेसमार्फत उनीहरुले रिट दायर गराएका थिए । रिट निवेदकहरुमा गुरुङ, धर्मप्रसाद गौतम र सुधिर शाह रहेका छन् । 

सोही इजलासमा जग्गा हिनामिनामा जोडिएकामध्ये १७ जना आरोपीहरुलाई पक्राउ यसअघि दिएको पक्राउ नगर्न दिएको अन्तरिम आदेश खारेजीका लागि प्रहरीको केन्द्रीय अनुसन्धान ब्यूरो (सीआईबी)ले दिएको भ्याकेट निवेदनमाथि पनि सुनुवाइ भएको छ । 

बहसमा सरकारी वकिलहरुले आरोपीलाई थुनामुक्त गरेमा मुद्दाका प्रमाण र सवुद नष्ट गर्न सक्ने खतरा रहेको भन्दै थुनामै रख्नुपर्ने जिकिर गरेका थिए । रिटमाथि आजै आदेश आउने संभावना रहेको छ ।