गैंडालाई खाल्डोमा पारेर खाग काटिएका घटनाका अभियुक्त २५ वर्षपछि पक्राउ

२२ असार, काठमाडौं । चितवन राष्ट्रिय निकुञ्जभित्र एकसिंगे गैंडा मारेको अभियोग लागेका व्यक्ति २५ वर्षपछि पक्राउ परेका छन् । पक्राउ पर्नेमा चितवनको कालिका नगरपालिका-२ का मिने साइँला भनिने भीमबहादुर थापा क्षेत्री रहेका छन् । उनी मीनबहादुरका छोरा हुन् । त्यही भएर उनी मिने साइँला भनेर चिनिन्थे ।

२०५५ कात्तिक २८ गते गस्तीका क्रममा निकुञ्जका टोलीले चितवन राष्ट्रिय निकुञ्जको अमृते पोष्टबाट करिब डेढ किलोमिटर पूर्वपन्ना खोलानजिक खाल्डोमा पारी खाग काटेर लगेको अवस्थामा मृत गैंडा भेटिएको घटनामा थापाको संलग्नता पुष्टि भएको थियो । 

उक्त घटनामा थापासहित १७ जनाविरुद्ध मुद्दा चल्दा जिल्ला अदालतले २०५५ माघ २५ गते फरार रहेका थापालाई १० वर्ष कैदसजाय र एक लाख रुपैयाँ जरिवाना तिराउने फैसला भएको थियो । २५ वर्षदेखि लुकिछिपी बस्दै आइरहेका उनलाई विशेष सूचनाका आधारमा निकुञ्ज सुरक्षार्थ खटिएको खड्गदल गणको संयुक्त टोलीले बिहीबार बेलुका कालिका नपा-२ बाट पक्राउ गरेको हो । 

फैसला कार्यान्वयनका लागि आज जिल्ला कारागार भरतपुरमा बुझाइएको चितवन निकुञ्जका सूचना कार्यालयले जनाएको छ । खागका लागि गैंडा र हात्ती मार्ने क्रम अझै रोक्न सकिएको छैन ।