​​​​​​​कोशीका मुख्यमन्त्रीविरुद्धको रिटमा आइतबार सुनुवाइ हुने

२२ असार, काठमाडौं । कोशी प्रदेशका नवनियुक्त मुख्यमन्त्री उद्धव थापाविरुद्ध सर्वोच्च अदालतमा आज दायर भएको रिट निवेदनमाथि आउँदो आइतबार सुनुवाइ हुने भएको छ । रिट दर्ता भएसँगै सर्वोच्चले असार २४ गते सुनुवाइ हुने गरी पेसी तोकेको छ ।

मुख्यमन्त्री थापाको नियुक्ति प्रक्रियामा संविधान मिचेको भन्दै प्रदेशसभाका प्रमुख प्रतिपक्षी दल नेकपा (एमाले) कोशीका संसदीय दलका नेता एवं निवर्तमान मुख्यमन्त्री हिक्मतकुमार कार्कीले नियुक्ति बदरको माग गर्दै रिट निवेदन दायर गराएका थिए । सुनुवाइ हुने इजलास भने साेही  दिन गाेलाप्रथाबाट ताेकिनेछ ।

राजनीतिक दलबाट अलग भएर सभामुख बनेका सभामुख बाबुराम गौतमले थापालाई मुख्यमन्त्री नियुक्तका लागि दाबी पेस निवेदनमा हस्ताक्षर गरेको भन्दै नियुक्ति बदर हुनुपर्ने माग रिट निवेदक कार्कीले गरेका छन् । 

मुख्यमन्त्री नियुक्तिका लागि आवश्यक ४७ मत पुर्याउन सभामुख गौतमले प्रदेशसभा सदस्यको रुपमा समर्थन पत्रमा हस्ताक्षर गरेका थिए । त्यसपछि उनको आलोचना सुरु भएको छ । उनले राजनीतिक निकासका लागि हस्ताक्षर गरेको तर प्रदेशसभा संचालनमा आफ्नो भूमिका निष्पक्ष हुने बताउँदै आएका छन् । 

बहुमतको समर्थनका आधारमा प्रदेश प्रमुख परशुराम खापुङले बिहीबार मात्र थापालाई संविधानको धारा १६८ को (२) बमोजिम मुख्यमन्त्री नियुक्त गरेका थिए । रिट निवेदक काकीले भने थापाले गरेको मुख्यमन्त्री थापालाई कामकारवाही रोक्ने र बहुमत दाबीमा सभामुखले हस्ताक्षर गर्न नमिल्ने जिकिर गर्दै संविधानको धारा १६८ को (३) बमोजिम प्रदेशसभाको सबैभन्दा ठूलो दलको हैसियतमा आफूलाई मुख्यमन्त्री नियुक्त गर्ने परमादेश जारी हुनुपर्ने माग गरेका छन् ।