अमरेशकुमारविरुद्ध आरजुको गाली बेइज्जती मुद्दा, क्षतिपूर्तिकाे समेत मागदाबी

२२ असार, काठमाडौं । कांग्रेस केन्द्रीय सदस्य तथा सांसद आरजु देउवा राणाले स्वतन्त्र सांसद अमरेशकुमार सिंहविरुद्ध गाली बेइज्जती मुद्दा दर्ता गरेकी छन् । 

उनले गत जेठ २४ गते जिल्ला अदालत काठमाडौंमा गाली बेइज्जती कसुरमा कारवाहीका लागि मुद्दा दायर गराएकी हुन् । मुद्दाको सुनुवाईअसार २४ गते अर्थात आगामी आइतवार हुने भएको छ । 

उनले अमरेशकुमारले संसदको तल्लो सदन प्रतिनिधिसभा बैठकमा आफूलाई ‘गणतन्त्रकी पम्फादेवी’, ‘महारानी’ भनेको तथा विभिन्न संचारमाध्यममा दिएका अन्तर्वार्तामा समेत ‘भ्रष्टाचारी’ भनेर मान प्रतिष्ठामा आँच पुग्ने र बेइज्जती गरेर मानहानी गरेको भन्दै मुद्दा दर्ता गराएकी हुन् । प्रमाण रुपमा उनले बैठक र अन्तर्वार्ता क्लिपसमेत पेस गरेकी छन् । 

उनले सिंहमाथि हदैसम्मको कारबाही र आफूलाई क्षतिपूर्ति भराउने आदेश माग गरेकी छन् । 

नेपालीलाई भुटानी शरणार्थी बनाएर अमेरिका उडाउने भनी सयौं नेपाली नागरिकसँग करोडौं रुपैयाँ ठगी गरेको प्रकरणमा पक्राउ परेका अभियुक्तहरुले आरजु र बालकृष्ण खाणकी पत्नी मञ्जु खाणलाई पैसा बुझाएको भनी समाचार बाहिरिएपछि रानालाई पक्राउ गरेर अनुसन्धान गर्नुपर्ने आवाज सर्वत्र भएका बेला संसद बैठकमा सिंहले प्रकरणमा नाम जोडिएका सबैलाई अनुसन्धानको दायरामा ल्याउन पटकपटक सरकारको ध्यानाकर्षण गराएका थिए । तैपनि आरजु र मञ्जु अनुसन्धान बोलाइएका छैनन् ।