नक्कली शरणार्थी र ललितानिवास प्रकरणमा सरकारले यसलाई समात र उसलाई नसमात भनेको छैनः गृहमन्त्री

३० असार, चितवन । उपप्रधान तथा गृहमन्त्री नारायणकाजी श्रेष्ठले नन्क्कली शरणार्थी, ललितानिवास सहितका कुनै पनि अनुसन्धानमा सरकारको हस्तक्षेप नरहेको बताएका छन् । उनले प्रहरीले कानुनको अधिनमा रहेर स्वतनत्र रुपमा अनुसन्धान प्रक्रियालाई अगाडि बढाइरहेको छ र यसमा सरकारले यसलाई समाउ र उसलाई नसमाउ नभनेको बताएका छन् । 

चितवनको भरतपुरमा पत्रकारसँग कुरा गर्दै श्रेष्ठले तथ्य र प्रमाणका आधारमा दोषीलाई कारबाही प्रक्रिया अघि बढेको बताउँदै उनले यसमा प्रहरीलाई कुनै दबाब नदिएको बताएका हुन् । उनले भने ‘हामीले प्रहरीलाई फलानालाई ल्याउनु फलानालाई नल्याउनु भनेका छैनौं । हामी त्यस्तो कुरा गर्दैनौं । निर्दोष फस्ने र दोषी उम्किने हुँदैन । तपाईँहरू काम गर्नुस् भनेका छौं । प्रहरीले त्यसै गरी कम गरिरहेको छ ।’

कसैले कोही मान्छे पक्राउ परोस् भन्ने चाहेर नभइ तथ्य प्रमाणका आधारमा समातिने उनले बताए । अनुसन्धानका क्रममा ढिलोचाँडो हुनसक्ने बताउँदै उनले कुनै पनि प्रकरणमा अनुसन्धानको काम नरोकिएको बताए ।

साथै, गृहमन्त्री श्रेष्ठले मिटरव्याज पीडितलाई न्याय दिने काम पनि नरोकिएको बताएका छन् । अहिले संसद पनि खुलिसकेको बताउँदै उनले सम्बन्धित विधेयकलाई छिटो पारित गरेर काम प्रभावकारी बनाउने बताए ।