कांग्रेसमा निलम्बनको परम्परा छैन, खाँणको विषय बैठकमा नउठाउनूः देउवा

२ साउन, काठमाडौं । नेपाली कांग्रेसका सभापति शेरबहादुर देउवाले नेपाली कांग्रेसको इतिहासमा अदालतले दोषी भनेर पूर्ण करार नगरेसम्म आरोप लागेका कसैलाई पनि निलम्बन गर्ने परम्परा नरहेको बताएका छन् । उनले मंगलबार बिहान धुम्बाराहीमा नेताहरूलाई यसबारे जानकारी गराएका हुन् ।

बैठकमा सहभागी एक नेताका अनुसार नक्कली शरणार्थी प्रकरणमा पुर्पक्षका लागि थुनामा रहेका केन्द्रीय सदस्य बालकृष्ण खाँणबारे बैठकमा छलफल गर्न सकिने भएपनि निलम्बन गर्नुपर्छ भनेर प्रस्ताव नल्याउन सभापति देउवाले आग्रह गरेका थिए ।   

पुर्पक्षका लागि थुनामा रहेका खाँणलाई निलम्बन गर्न सभापति देउवा तयार नभएपछि महामन्त्री थापाले जेठ २ मा विज्ञप्ति निकालेका नै निकालेका थिए । महामन्त्री थापाको यस कदमबाट असन्तुष्ट रहेका देउवाले आजको केन्द्रीय समितिको बैठकमा खाँण निलम्बन हुनुपर्ने भनिएको विषय भरसक नउठाए हुने भन्ने सोच बनाएका छन् । 

सोमबारको पदाधिकारी बैठकमा पनि देउवाले खाँणलाई निलम्बन गर्न कांग्रेसकाे परम्पराले नदिने बताएका थिए । आज पनि उनले खाँण दोषी ठहर नभइसकेको र अभियुक्त मात्रै भएकाले उनलाई कांग्रेसकाे  परम्परा अनुसार पनि कारबाही गर्न नसकिने बताएका छन् । 

देउवाले परम्परालाई ध्यानमा राखेर छलफल गर्न सकिने तर निलम्बन गर्ने विषय सम्भव नहुने बताएका छन् । उनले बैठकबाट खाँणलाई निलम्बन गर्ने हो भने भ्रष्टाचार आरोपमै मुद्दा खेपिरहेका अर्का नेता विजयकुमार गच्छदारको हकमा के गर्ने भन्ने प्रश्न पनि उठाएका छन् । यसैले यो विषयमा चर्चा भएपनि निलम्बन भने नहुने देखिएको छ ।