प्रहरी प्रमुखसहित भन्सार र अध्यागमनका अधिकारी लिएर विमानस्थलको निरीक्षणमा पुगे गृहमन्त्री श्रेष्ठ

५ साउन, काठमाडौं । उपप्रधान तथा गृहमन्त्री नारायणकाजी श्रेष्ठ जाँचपासबाटै बाहिरिएको अवस्थामा समातिएको एक सय किलो सुन काण्डबारे भइरहेको अनुसन्धान र छानविनको अवस्था बुझ्न चार निकायका प्रमुख लिएर शुक्रबार त्रिभुवन अन्तर्राष्ट्रिय विमानस्थल पुगेका छन् । त्यहाँ उनीसहितको टोलीले अध्यागमन र भन्सारको निरीक्षण गरेको छ । 

नेपाल प्रहरीका प्रमुख वसन्त कुँवर, भन्सार विभागका महानिर्देशक शोभाकान्त पौडेल, राजश्व अनुसन्धान विभागका महानिर्देशक नवराज ढुंगाना र अध्यागमनका विभागका महानिर्देशक झलकराम अधिकारीलाई लिएर गृहमन्त्री अनुगमनमा निस्किएका हुन् । 

भन्सारको सुरक्षा जाँचपास गर्ने मेसिनलगायतको कमजोरी बाहिरिएपछि उनी निरीक्षणमा गएका हुन् । भन्सार विभागका निर्देशकसमेत रहेका प्रवक्ता पुण्यविक्रम खड्काका अनुसार खरिदार कुमार ढकाललाई निलम्बन गरि सकिएको छ भने भन्सार अधिकृत सन्तोष चन्दलाई निलम्बनका लागि अर्थ मन्त्रालयमा सिफारिस गरिएको छ ।

त्यस्तै भन्सार एजेन्ट यादव पराजुलीलाई समेत निलम्बन गरिएको प्रवक्ता खड्काले नेपालबहसलाई जानकारी दिए । त्रिभुवन अन्तर्राष्ट्रिय विमानस्थल भन्सार कार्यालयबाट मंगलबार स्कुटर र मोटरसाइकल ‘ब्रेक सु’ को नामबाट करिब सय किलो सुन जाँचपास गराउने कर्मचारीलाई भन्सार विभागले निलम्बन गरेको हो । भन्सार जाँचपास अधिकृत सन्तोष चन्द र जाँचकी कुमार ढकालले गरेका थिए ।