आइक्यानबाट नबिल र मुक्तिनाथले पाए उत्कृष्ट पुरस्कार

६ साउन, काठमाडौं । हरेक वर्ष सार्वजनिक हुने वार्षिक वित्तीय प्रतिवेदन वास्तविक र उत्कृष्ट भएको भन्दै नेपाल चार्टर्ड एमाउण्टेन्टहरुको संस्था आइक्यानले नबिल बैंक र मुक्तिनाथ विकास बैंकलाई पुरस्कृत गरेको छ  । वित्तीय क्षेत्रतर्फ मुक्तिनाथ विकास बैंकको वार्षिक प्रतिवेदन उत्कृष्ट ठहरिएको छ । 

आईक्यानले विकास बैंक र वित्त कम्पनीमध्येबाट मुक्तिनाथ विकास बैंकलाई राष्ट्रिय उत्कृष्ट वार्षिक प्रतिवेदन अवार्ड दिएको हो । यस्तै नबिल बैंक पनि नेपाल चार्टर्ड एकाउन्टेन्ट्स संस्थाबाट वार्षिक रुपमा प्रदान गरिने राष्ट्रिय उत्कृष्ट वार्षिक प्रतिवेदन अवार्ड २०२२ बाट सम्मानित भएको छ । नबिलले बैंकिङ क्षेत्र तर्फको सिल्भर अवार्ड प्राप्त गरेको छ । 

आईक्यानबाट मुक्तिनाथ बैंक लगातार चौथोपटक पुरस्कृत भएको हो । आईक्यानका नवनिर्वाचित अध्यक्ष र उपाध्यक्षको सपथग्रहण समारोहमा अर्थमन्त्री डा. प्रकाशशरण महतले अवार्ड प्रदान गरेका थिए । बैंकले डिजिटल कारोबारलाई प्रोत्साहन गर्न आफ्नो एटीएम प्रयोग गरी नेपालभर रहेका भिसा नेटवर्कमा आवद्ध जुनसुकै बैंकको एटीएम मेसिनबाट निःशुल्क रकम झिक्न सकिने व्यवस्था गरेको भन्दै पुरस्कृत गरिएको हो ।  

वित्तीय पारदर्शिता, जवाफदेहिता र सुशासनका लागि उक्त अवार्ड प्रदान गरिएको हो । नबिल बैंकको वार्षिक प्रतिवेदन नेपालका तर्फबाट साउथ एसियन फेडेरेसन अफ एकाउन्ट्यान्टस् (साफा) ले दक्षिण एसियालीस्तरमा गर्ने साफा बीपीए अवार्डका लागि प्रतिस्पर्धा गर्न समेत मनोनित हुने बताइएको छ ।