राजश्व अनुसन्धान विभागले रेडी ट्रेडको गोदामबाट बरामद कार्टुनमा भेटियो सुन गालेर गहना बनाउने साँचो

११ साउन, काठमाडौं । राजश्व अनुसन्धान विभागले रेडी ट्रेडको गोदामबाट बरामद गरेको कार्टुनमा सुन गालेर गहना बनाउन प्रयोग गरिने साँचो भेटिएको छ । विभाग उच्च स्रोतका अनुसार कार्टुन खोलेर चेक गर्दा उक्त साँचो भेटिएको हो । भेटिएको साँचो सार्वजनिक गर्ने विभागले तयारी गरेको छ । बरामद भएका अधिकांश कार्टुन खोलेर सामान निकालिएको पाइएको छ । 

रेडी ट्रेडले दुई महिनामा १९९७ किलो सामान आयात गरेको विमानस्थल भन्सार कार्यालयले जनाएको छ । क्विन्टल सुन बरामद भएको घटनाको छानबिनका क्रममा एक चिनियाँ, एक भारतीय, भन्सार कर्मचारी एजेन्टलगायतका १७ जना पक्राउ परिसकेका छन् । बुधबार बैंक ठगी, सेयर घोटाला र हुन्डीमा विवादित व्यापारी राजेशकुमार अडुकियाको घरमा छापा मारेको थियो ।  

स्रोतका अनुसार कार्टुनमा रहेको सामानहरूको साइज, प्याकिङ, डिजाइन सबै गत २ गते बरामद गरिएको सुनको ब्रेक सु जस्तै पाइएको छ । रेडी ट्रेडले सुन भित्र्याउने क्रममा ती सामान ल्याएको विभागको प्रारम्भिक अनुमान छ । बरामद गरिएका ६६ मध्ये एक दर्जन कार्टुन खोल्न बाँकी रहेको बताइएको छ । बरामद गरिएको कार्टुनमा सुनको गहना बनाउन प्रयोग हुने साँचो जस्तो देखिने वस्तु भेटिएपछि यसको अनुसन्धान भइरहेको छ । 
यस साँचोबाट आयात गरेको सुनलाई गहना बनाएर अन्यत्र लाने गरिएको हुनसक्ने विभागको अनुमान छ । स्रोतका अनुसार बरामद सबै कार्टुनमा ‘ब्रेक सु’ नै लेखिएको छ । उक्त कार्टुनमा रहेको सामानको विस्तृत अवस्थाका बारेमा अनुसन्धान भइरहेको छ । रेडी ट्रेडको नाममा आएका सामान सबै शंकास्पद देखिएका छन् ।