कुशादेवी माविका शिक्षक गौतमविरूद्ध छात्रामाथि यौन दुर्व्यवहार गरेको आरोप

१७ साउन, काठमाडौं । काभ्रेको पनौती नगरपालिका-२ स्थित संचालित कुशादेशी माविका शिक्षक छविरमण गौतममाथि छात्रालाई यौन दुर्व्यवहार गरेको आरोप लगाइएको छ ।

गणित विषय पढाउँदै आइरहेका गौतमले विद्यालयका छात्राहरुमाथि यौन दुर्व्यवहार गरेको भन्दै सोही विद्यालयका विद्यार्थीहरुले कारवाही गर्न माग गरेका छन् । 

सोही विषयमा विद्यार्थी संगठन अखिल (क्रान्तिकारी)ले गौतमलाई पक्राउ गरी तत्काल कारवाही अगाडि बढाउन सम्बन्धित निकायको ध्यानाकर्षण गराएका छ् । अखिल (क्रान्तिकारी) काभ्रेका संयोजक प्रेमले बुधबार एक प्रेस विज्ञप्ति जारी गर्दै शिक्षक गौतमलाई नियन्त्रणमा लिई घटनाबारे अनुसन्धान गर्न माग गरेका छन् । 

संयोजक प्रमेले शिक्षक गौतमले विद्यालयको कक्षा १० मा अध्ययनरत छात्राहरुमाथि यौन दुर्व्यवहार गरेको भन्दै घटनाप्रति गम्भीर ध्यानाकर्षण भएको जनाएका छन् । उनले घटनाको निन्दा र भत्सर्ना गरेका छन् ।

उनले दोषीलाई कारवाही गर्नुको विभिन्न बहानामा उन्मुक्ति दिन खोजिएको भन्दै कारवाहीको दायरामा नल्याए कडा सघर्ष घोषणा गर्ने चेतावनी समेत दिएका छन् । संघर्षबाट उत्पन्न हुने परिणामको जिम्मेवारी राज्य पक्ष हुने समेत उनले बताएका छन् ।

साथै विद्यालयमा छात्रालाई निर्भय र शान्त वातावरणमा अध्ययन गर्न पाउने अवस्था बनाउन समेत जिल्ला र नगर प्रशासनसँग आग्रह गरिएको छ ।