सर्वोच्चका न्यायाधीश नहकुल सुवेदीका पीएसओ अधिकृतको पेस्तोल चोरी, दुई जना पक्राउ

२१ साउन, काठमाडौं । सर्वोच्च अदालतका न्यायाधीश नहकुल सुवेदीका निजी सुरक्षा अधिकृत प्रभाकर खड्काको पेस्तोल घरबाटै चोरी भएको छ । चोरी गरेको आरोपमा दुई जना पक्राउ परेका छन् । पक्राउ पर्नेमा सिन्धुपाल्चोकका २४ वर्षीय वासुदेव थामी र सिन्धुलीका मेगबहादुर तामाङ रहेका छन् । 

जिल्ला प्रहरी परिसर, काठमाडौंका एसपी कुमुद ढुंगेलका अनुसार, उनीहरूले ३० असारमा चोरी गरेको पेस्तोल बौद्धको शिवमन्दिर नजिकै बरामद भएको छ । त्यसमा लाग्ने ७ राउण्ड गोली पनि बरामद भएको छ । उनीहरू नियमित यस क्षेत्रमा चोरी गर्ने समूह मध्येका भएको पाइएको छ । 

प्रहरीका अनुसार उनीहरूले खड्काका घरको झ्यालबाट अंकुशे लगाएर भित्रबाट झोला तानेका थिए । झोलाभित्र खड्काले पेस्तोल, त्यसमा लाग्ने गोली लगायत राखेका थिए । पेस्तोल चोरी भए लगत्तै उनले भोलिपल्ट प्रहरी वृत्त, बौद्धमा जानकारी गराएका थिए । जिल्ला प्रहरी परिसर, काठमाडौंले थप अनुसन्धान गरिरहेको छ ।