शिक्षक तथा विद्यार्थीमा आँखा पाक्ने समस्या बढेपछि विद्यालय ५ दिन बन्द

२१ साउन, काठमाडाैं । शिक्षक तथा विद्यार्थीमा आँखा पाक्ने रोगको प्रकोप बढ्दै गएपछि सिन्धुलीको कमलामाइ नगरपालिकाका विद्यालय पाँच दिनका लागि बन्द गरेका छन् ।

आँखा पाक्ने रोगको संक्रमणलाई न्युनिकरण गर्नका लागि आज बसेकाे बैठकले भाेलि सोमबारदेखि शुक्रबारसम्म  पाँच दिनका लागि विद्यालय बन्द गर्ने निर्णय गरिएको  नगरपालिकाका प्रमुख प्रशासकीय अधिकृत सूर्यप्रसाद दाहालले बताए ।

उनका अनुसार नगर मातहतका सामुदायिक र संस्थागत विद्यालय बन्द रहनेछन्  । बैठकले सम्पूर्ण सामुदायिक तथा संस्थागत विद्यालय बन्द गर्न र सामाजिक दूरी कायम गर्न अनुरोध गरिएको उनले बताए । कमलामाई नगरपालिका अन्तरगत ८४ वटा सामुदायिक र २४ वटा संस्थागत विद्यालय रहेका छन् ।

संक्रमण हुँदा बिरामीमा आँखा बिझाउने, चिलाउने, चिप्रा टाँसिने, आँखा रातो हुने, आँसु बग्ने, घाममा हिंड्न गाह्रो हुने लगायत लक्षण देखा पर्ने गरेका छन् ।