अवरुद्ध संसद खोल्ने सहमति जुटाउन सभामुखसहित बालुवाटार पुगे ओली र देउवा

२३ साउन, काठमाडौं । प्रमुख प्रतिपक्षी दल नेकपा एमालेका कारण लामो समयदेखि अवरुद्ध संसद खुलाउने सहमति खोज्न प्रधानमन्त्रीको सरकारी निवास बालुवाटार सभामुखसहित तीन दलका नेता छलफलमा जुटेका छन् । 

बैठकमा प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली र सभामुखसहित तीन दलका प्रमुख सचेतकहरू उपस्थित छन् । तस्करीको सुन प्रकरणलाई लिएर एमालेले उच्चस्तरीय छानविन समितिको माग गर्दै संसदमा गतिरोध कायम गरेपछि हिजोदेखि सदन सुचारु गर्नका नेताहरु निरन्तर छलफलमा छन् । 

सोमबार २ चरणमा भएको छलफलबाट सहमति ननिस्किएपछि फेरि बैठक बोलाइएको हो । सुन तस्करीको विषयमा प्रमुख प्रतिपक्षी दल नेकपा एमालेले उच्चस्तरीय छानविन समिति बनाउने विषयमा लिएको अडान र सत्तापक्षले पनि सो छानविन समिति आवश्यक नभएको भन्दै लिएको अडानका कारण सोमबारका लागि तय भएको प्रतिनिधि सभाको बैठक बस्न सकेको थिएन । आज अपराह्न ३ बजेका लागि बैठक बोलाइएको छ ।