शिक्षा विधेयकविरूद्ध उभिए नीजि विद्यालय संचालक, गुठीमा नजाने

२३ साउन, काठमाडौं । निजी विद्यालय संचालकहरुले सरकारले ल्याएको शिक्षा विधेयकको विरोध गरेका छन् । उनीहरुले मंगलबार काठमाडौंमा पत्रकार सम्मेलन गरी विधेयकमा राखिएको निजी विद्यालयहरुलाई पाँच वर्षभित्र गुठीमा लैजाने प्रावधानको विरोध गरेका हुन् । 

निजी क्षेत्रका विद्यालय संचालकहरुको संगठन ब्याप्सन र निजी विद्यालयमा कक्षा ११ र १२ कक्षा संचालन गर्ने संचालकहरुको संस्था हिसानले पत्रकार सम्मेलन गरेर विरोध जनाएका हुन् । 

हिसानका अध्यक्ष एवं गोल्डेन गेट इन्टरनेशल कलेजका प्रमुख संचालक रमेशकुमार सिलवालले निजी विद्यलायलाई गुठीमा लैजान विधेयक अस्वीकार्य रहेको बताए । उनले विधेयक संशोधन गर्न माग गरे । संशोधन नभए आन्दोलन गर्ने उनीहरुको भनाइ छ ।

ब्याप्सनका प्रतिनिधिले मेहनत गरेर हुर्काइ बढाएर फल खाने बेला सरकारले लिने गरी ल्याएको विधेयक नमान्ने बताए । उनले शिक्षालाई कम्पनी ऐनमार्फत संचालन गर्न पाउनुपर्ने जिकिर गरे । 

शिक्षालाई सरकारले जिम्मा लिने नीति अनुरुप सरकारले विधेयकमा निजी विद्यालयलाई कानून बनेको मितिदेखि पाँच वर्षभित्र गुठीमा जानुपर्ने प्रावधान राखिएको छ । यो प्रावधानको समर्थन भने बढ्ने क्रम छ । निजी क्षेत्रका विद्यालयहरुले मनपरी शुल्क लिएर शिक्षामा व्यापार गरेको भन्दै शिक्षालाई पूर्णरुपमा सरकारले लिनुपर्ने आवाज चौतर्फी बढदै गएको छ ।

यसैबीच, सोमबार मात्र थारु समूदायले काठमाडौंमा पत्रकार सम्मेलन गरी विधेयकमा आदिवासी जनजाति, मुस्लिम, पिछडा वर्ग, थारु लगायतलाई छुट्याइएको २२ प्रतिशत आरक्षणप्रति आपत्ति जनाएको थियो । थारुहरुलाई मात्र अलग्गै आरक्षणको व्यवस्था गर्नुपर्ने माग उनीहरुको थियो । विधेयक संशोधन नगरी पास नगर्न चेतावनी थियो ।

विधेयकलाई संसदमा दफावार छलफल गर्न मन्त्रिपरिषद्ले गत मंगलबार नै स्वीकृत दिइसकेको छ । संभवतः आज बस्ने प्रतिनिधिसभाको बैठकमा शिक्षामन्त्री अशोककुमार राईबाट पेस हुनेछ ।

यो पनि पढ्नुहोस