१२ अर्ब नाफा कमाएको नेपाल विद्युत प्राधिकरणले अब सर्वसाधरणमा शेयर जारी गर्छः कुलमान घिसिङ

२५ साउन, काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले नाफाका आधारमा विद्युत प्राधिकरणले सर्वसाधारणमा शेयर जारी गर्न लागेको जानकारी दिएका छन् । 

गत आर्थिक वर्षमा १२ अर्ब ३३ करोड खुद नाफा कमाएको नेपाल विद्युत प्राधिकरणले सर्वसाधारणलाई सेयर जारी गर्ने भएको हो । प्राधिकरणले बिहीबार आयोजना गरेको पत्रकार सम्मेलनमा कार्यकारी निर्देशक कुलमान घिसिङले प्राधिकरण ऐन २०४१ बमोजिम सर्वसाधारणमा शेयर जारी गर्ने प्रक्रिया अघि बढाइएको बताए ।

विगत दुई वर्षमा प्राधिकरणले आफ्नै स्रोतबाट करिब ४८ अर्ब रूपैयाँ बराबरको रकम प्रसारण तथा वितरण प्रणाली विस्तार र सुधारमा लगानी भएको छ । त्यस्तै सरकारको कोषमा साँवा ब्याज र रोयल्टी गरी ३० अर्ब जम्मा गरिएको छ । 

प्राधिकरणले गत आर्थिक वर्ष मुलुकभित्रै विद्युत बिक्रीबाट कुल ८९ अर्ब ७८ करोड रूपैयाँ बराबर आम्दानी गरेको छ भने भारतलाई विद्युत बिक्री गरी १० अर्ब ५९ करोड रूपैयाँ बराबर आम्दानी गरेको छ । आन्तरिक र बाह्य गरी विद्युत बिक्रीबाट कम्पनीले १ खर्ब आम्दानी गरेको छ । कुल आम्दानी भने अघिल्लो आर्थिक वर्ष २०७८/७९ को तुलनामा १२ अर्ब बढी हो । 

कम्पनीले आर्थिक वर्ष २०७८/७९ मा ८८ अर्ब १३ करोड आम्दानी गरेको थियो । आम्दानी बढे पनि कम्पनीको कर्मचारी तथा अन्य खर्चहरू बढ्दा गत आर्थिक वर्षको नाफामा केही कमी आएको देखिन्छ । २०७८÷७९ मा कम्पनीले कुल १३ अर्ब ३७ करोड खुद नाफा कमाएको थियो । 

सर्वसाधारणलाई शेयर जारी गर्नका लागि इक्रा नेपालबाट एए प्लस रेटिङ पाएको उनले बताए । सर्वसाधारणलाई सेयर जारी गर्न प्रक्रिया अघि बढिरहेको घिसिङको भनाइ छ । सर्वसाधारणमा दिइने विद्युत गुणस्तर सुधार, चुहावट नियन्त्रण तथा विद्युत महसुल असुली लगायतका कार्यलाई प्रभावकारी बनाइने घिसिङले बताए ।