युवतीलाई युकेबाट काठमाडौं बोलाएर बलात्कार गरेको आरोप लागेका युवकविरुद्ध मुद्दा दर्ता

२५ साउन, काठमाडौं । युवतीलाई बलात्कार गरेको आरोपमा प्रहरीले एक युवकलाई पक्राउ गरेको छ । पक्राउ पर्नेमा कैलालीको धनगढी उपमहानगरपालिका–२ का ४० विजेन्द्रबहादुर सिंंह रहेको प्रहरीले जनाएको छ । 

उनले युकेमा बसेकी युवतीलाई टिकटकमार्फत चिनजान गरी विवाह गर्न काठमाडौं बोलाएर गएको असार ३१ गते सिनामंगलस्थित एक होटलमा पुर्याएर बलात्कार गरेको आरोप छ । सिंहविरुद्ध काठमाडौं जिल्ला अदालत काठमाडौंमा जबर्जस्ती करणीमा मुद्दा दर्ता भएको छ । 

बलात्कारपछि विवाहको सट्टा घटनाबारे कसैलाई नभन्न र भनेमा ज्यान मार्ने धम्की दिएपछि पीडित युवतीले प्रहरीमा जाहेरी दिएकी थिइन् । सोही आधारमा सिंहलाई प्रहरीले पक्राउ गरी अनुसन्धान सकेर जिल्ला सरकारी वकिलको कार्यालयमार्फत बुधबार मुद्दा दर्ता गरेको हो ।