सेटिङबिना क्वीन्टलका क्वीन्टल सुन तस्करी संभव हुँदैन : सांसद न्यौपाने

२६ साउन, काठमाडौं । क्वीन्टल सुन तस्करीबारे सरकारको आलोचना गर्ने क्रम आज पनि प्रमुख प्रतिपक्षी नेकपा (एमाले)का सांसदहरुले जारी राखेका छन् । शुक्रबार बिहान ११ बजे सुरु भएको राष्ट्रियसभाको बैठकमा दलीय आधारमा बोल्दै एमाले सांसद भगवती न्यौपानले क्वीन्टल सुन प्रकरणमा तस्करसँग सरकारका मन्त्री र कर्मचारीको सेटिङ रहेको आरोप लगाइन् । 

उनले एमालेले समसामयिक विषयमा जनताको आवाज उठाउन संसद चल्न दिने निर्णय गरेपनि सुन प्रकरणमा उच्चस्तरीय छानबिन समिति गठन गर्नुपर्ने माग यथावत रहेको बताइन् । 

समितिले मात्र कुनैपनि वस्तुमा भएका तस्करीमाथि छानबिन गर्न सक्ने र त्यसमा संलग्न मन्त्री, सुरक्षा निकायका प्रमुखमाथि छानबिन गर्न सक्ने उनको भनाइ छ । उनले त्रिभुवन अन्तर्राष्ट्रिय विमानस्थलबाट क्वीन्टलभन्दा बढी सुन तस्करी प्रकरणमा तस्करसँग सरकार मन्त्री र चेकजाँचको जिम्मा पाएका सुरक्षा प्रमुखहरुको सेटिङ भएको घटनाक्रम आइरहेको बताइन् । ‘सरकारमा बस्ने मन्त्री र सुरक्षा अधिकारीकाे सेटिङबिना कसरी संभव भयाे ?’ सांसद न्याैपानेले प्रश्न गरिन् । सेटिङबिना क्वीन्टलका क्वीन्टल सुन तस्करी संभव हुँदैन ः सांसद न्यौपाने 

सरकारले उच्च स्तरीय समिति गठन नगरेकै कारण बाध्य भएर संसद अवरुद्ध पार्न एमाले बाध्य भएको उनको भनाइ थियो । संसद बैठक अवरुद्धको दोष एमालेमाथि लगाएर सरकार तस्करलाई बचाउने ध्याउन्नमा लागेको आरोप लगाइन् ।