भोलीदेखि मंगलबारसम्म उपत्यकाका सडक र सिँचाइ विभागमा विहान ९ देखि ३ बजेसम्म तालाबन्दी र धर्ना

२७ साउन, काठमाडौं । सरकारले लामो समयसम्म भुक्तानी नदिएको भन्दै चरणबद्ध आन्दोलनमा उत्रिएका निर्माण व्यवसायीहरुले भोली आइतबारदेखि मंगलबासम्म देशभरका सडक र सिँचाई विभागमा तालाबन्दी गर्ने भएका छन् । यो उनीहरुको तेस्रो चरण अन्तर्गतको कार्यक्रम भएको बताइएको छ ।

शुक्रबार बसेको नेपाल निर्माण व्यवसायी महासंघले बैठकले तालाबन्दी र धर्ना दिने निर्णय गरेको हो । सरकारले लामो समयदेखि आयोजनाहरूको रकम भुक्तानी नदिएकाले जारी आन्दोलनलाई थप सशक्त बनाउने निर्णय भएको अध्यक्ष रवि सिंहले बताए । उनले महासंघको बैठकले आन्दोलनलाई तेस्रो चरणमा २८ गतेदेखि सडक विभाग र सिँचाइ विभागमा ताला लगाउने घोषण गर्दै जिल्ला संघहरुलाई पनि उपस्थित हुन भनिएको बताए । 

महासंघले नेपाल सरकारबाट जारी भएको म्याद थपको आदेश र भुक्तानी लगायतका १० बुँदे मागहरूका सम्बन्धमा लामो समयदेखि आन्दोलन गर्दै आइरहेको छ । महासंघले राजधानी केन्द्रित आन्दोलनको पहिलो र दोस्रो चरणको कार्यक्रम सम्पन्न गरिसकेको छ । महासंघले तेस्रो चरणको आन्दोलन अन्तर्गत सडक विभाग र सिँचाइ विभागमा तालाबन्दीसहित धर्ना दिन लागेको जनाएको छ ।