निर्माण व्यवसायीहरूले गरे सडक विभागमा विरोधसभा

३० साउन, ललितपुर । निर्माण पूरा भएको आयोजनाहरुको भुक्तानी माग गर्दै महिना दिनदेखि सडक संघर्ष रहेका निर्माण व्यवसायीहरुले आज चाकुपाटस्थित सडक विभागको गेटमा धर्ना दिएका छन् । 

निर्माण काम पूरा भएका आयोजनाहरुको भुक्तानी तत्काल गर्न, परिस्थितिजन्य कारण कच्चा पदार्थको अभावमा निर्माण कार्य पूरा हुन नसकेका आयोजनाहरुको म्याद थप हुनुपर्ने लगायत माग गरेका छन् । धर्नासँगै उनीहरुले विरोधसभा गरिरहेका छन् । कालो ब्यानर, प्लेकार्ड प्रदर्शन गरेका छन् । 

तत्काल भुक्तानीको माग गर्दै निर्माण व्यवसायीहरूले सरकारविरुद्ध नाराबाजी गरिरहेका छन् । उनीहरुका अनुसार विभिन्न मन्त्रालय मातहतका कार्यालयसँग करि ४ अर्ब  रुपैयाँ भुक्तानी पाउन बाँकी छन् ।

विभाग परिसरमा प्रवेश गर्न खोजेका उनीहरुलाई प्रहरीले गेटमै रोकेका छन् । बाक्लो संख्यामा सरक्षाकर्मी परिचालन गरिएको छ ।