प्रदेशसभा बैठकमा पनि एमालेको अवरोध, कर्णालीमा अर्को बैठक साउन ३२ गते

३० साउन, काठमाडौं । प्रदेशमा पनि प्रमुख प्रतिपक्षको कुर्सीमा रहेको नेकपा (एमाले)ले कर्णालीसभाको आजको बैठक अवरुद्ध गरेको छ । नागरिक उड्डयन प्राधिकरणको निर्णयले कर्णालीका बासिन्दालाई समस्यामा पारेको भन्दै निर्णय सच्याउन प्रदेश सरकारले बेवास्ता गरेको बैठक चल्न नदिएको हो । 

बैठकको सुरुमै एमाले प्रमुख सचेतक टेकराज पछाईले नागरिक उड्डयन प्राधिकरणको निर्णयले कर्णालीका जनताले थप दुःख झेल्नु परिरहेको बताए । दिउँसो १२ बजेपछि उडान नगर्ने प्राधिकरणको निर्णय सच्याउने पहल गर्न उनले प्रदेश सरकारको ध्यानाकषर्ण गराए । उडानको समय तोकिँदा बिरामीले विकट क्षेत्रका बिरामीले उपचार नपाएर ज्यान गुमाउन विवश भएको उनको भनाइ थियो । 

वर्षा याममा मौसम प्रतिकूल हुने भन्दै नागरिक उड्डयन प्राधिकरणले दिउँसो १२ बजेपछि ग्रामिण क्षेत्रका विमानस्थलमा जहाज सञ्चालन नगर्ने निर्णय गरेको  छ । बैठक चल्न नदिएपछि सभामुख नन्दा गुरुङले साउन ३२ गतेसम्मका लागि स्थगित गरेकी छन् ।

एमालेले संघीय सरकारको प्रतिनिधिसभा र राष्ट्रियसभा बैठक पनि सुन प्रकरणको छानबिन गर्न उच्चस्तरीय समिति गठनको माग गर्दै साउन १० देखि अवरुद्ध पार्दै आइरहेको छ ।