कक्षा १२ को नतिजा सार्वजनिक, उत्तीर्ण दरमा सुधार

३० साउन, काठमाडौं । राष्ट्रिय परीक्षा बोर्डले कक्षा १२ को वार्षिक परीक्षाको नतिजा मंगलबार साँझ सार्वजनिक गरेको छ । ५ बजे सावृजनिक गर्ने भनिएपनि एक घण्टा ढिला सार्वजनिक भएको हो । 

सार्वजनिक नतिजाअनुसार गत वर्षको तुलनामा सुधार आएको छ । यसवर्ष ५०.०९ प्रतिशत विद्यार्थी उत्तीर्ण भएका छन् । गत वर्ष ४८ प्रतिशतमा सीमित थियो । यो वर्षको परीक्षामा ४९.०९ प्रतिशत विद्यार्थीले नन ग्रेडेड (एनजी) आएको बोर्डका अध्यक्ष डा. महाश्रम शर्माले जानकारी दिए । परीक्षा सकिएको ८० दिनमा परीक्षाफल प्रकाशित भएको उनले बताए ।

उत्तीर्ण भएकामध्ये एक दशमलब ७८ प्रतिशत अर्थात ६ हजार ९ सय ७६ जनाले ४ जीपीए ल्याएका छन् । 

गत बैशाख २६ गतेदेखि जेठ ५ गते सम्पन्न परीक्षामा चार लाख ६७ हजार ३८९ विद्यार्थी सहभागी भएका थिए । जसमध्ये ५६ हजारभन्दा बढी विद्यार्थीले ग्रेड वृद्धिका लागि परीक्षा दिएका थिए । 

लेटर ग्रेडिङ निर्देशिका अनुसार प्रत्येक विषयको सैद्धान्तिकतर्फ न्यूनतम ३५ प्रतिशत अंक प्राप्त गरेका विद्यार्थीले ग्रेडसिट प्राप्त गर्ने व्यवस्था छ । लेटर ग्रेडिङ निर्देशिकामा संशोधन गरेर जुन विषयमा नन ग्रेडेड (एनजी) हुन्छ त्यही विषयको मात्र ग्रेड वृद्धि परीक्षा दिए पुग्छ ।  यसअघि दुईभन्दा बढी विषयमा एनजी आएमा अर्को वर्ष सबै विषयको परीक्षा दिनुपर्ने अवस्था थियो ।