प्रधानमन्त्रीसहित रक्षामन्त्री र सेनापतिसँग भेटवार्ता गर्न चीनको उच्च सैनिक टोली आज नेपाल आउँदै

३१ साउन, काठमाडौं । चिनियाँ सेनाको एक टोली आज नेपाल आउँदै छ । चीनको तिब्बत मिलिट्री कमाण्डको मेजर जनरल यु एनदे नेतृत्वको टोली आज दिउँसो काठमाडौं आउन लागेको हो । 

यो टोलीले नेपालका प्रधानमन्त्री पुष्पकमल दाहाल प्रचण्ड, उपप्रधान तथा रक्षामन्त्री पुर्णबहादुर खड्का र प्रधान सेनापति प्रभुराम शर्मासँग भेटवार्ता गर्ने कार्यक्रम तय भएको नेपाली सेनाले जनाएको छ । जनमुक्ति सेनाको छेन्दु मिलिट्री कमाण्डका डेपुटी कमान्डर उपरथी यु एनदे नेतृत्वको टोली काठमाडौँ आएपछि यो भेटघाट राखिएको छ ।  
 
चिनियाँ सेनाको टोली तीन दिने औपचारिक भ्रमणका लागि काठमाडौं आउन लागेको नेपाली सेनाका प्रवक्ता कृष्णप्रसाद भण्डारीले जानकारी दिए । भेटमा दुई देश बीचको सैन्य सम्बन्ध, सीमा सुरक्षा लगायतका विषयमा छलफल हुने बताइएको छ । 
 
नेपालसँग सीमा जोडिएको तिब्बत मामिला हेर्ने उच्च तहका सैनिक अधिकारी कोभिडपछि नेपाल आउन लागेको यो पहिलो भ्रमण हो । टोलीले नेपाली सेनाको शिवपुरीस्थित कमान्ड तथा स्टाफ कलेजमा समेत भ्रमण गर्ने कार्यक्रम रहेको छ ।