कांग्रेसको संगठन सुदृढीकरणको १० दिने अभियान सम्पन्न, जिल्लादेखि इकाइसम्मको प्रतिवेदन बुझाइँदै

 ३१ साउन, काठमाडौं । नेपाली कांग्रेसको साउन २० गतेदेखि संचालन गरेको पहिलो चरणको आन्तरिक संगठन सुदृढीकरण अभियान सकिएको छ । साउन पहिलो साता बसेको केन्द्रीय कार्यसमिति बैठकको निर्णयअनुसार कांग्रेसले पहिलो चरणको १० दिने आन्तरिक संगठन सुदृढीकरण अभियान सुरु गरेको थियो । त्यो साउन ३० मा सम्पन्न भएको छ । 

२० साउनदेखि हिजोसम्म चलेको अभियान अन्तर्गत ७७ जिल्ला र १६५ वटै निर्वाचन क्षेत्रसम्म कांग्रेसका केन्द्रीय नेताहरू पुगेर संगठनको अवस्थाबारे जानकारी लिएका छन् । उनीहरूले पार्टी, भ्रातृ संस्था, शुभेच्छुक संस्था र जनप्रतिनिधिहरूलाई भेटेर पार्टी संगठनबारे सशक्तिकरण र परिचालन गरेका छन् ।  अभियानले जिल्ला, प्रतिनिधिसभा निर्वाचन क्षेत्र, प्रदेशसभा निर्वाचन क्षेत्र, स्थानीय तह, वडा र टोल तहसम्म पार्टीको संगठनको अवस्था के छ ? भ्रातृ संस्था र शुभेच्छुक संस्थाको अवस्था के छ भनेर जानकारी लिने, समस्याको पहिचान गर्ने काम गरेको छ । 

कांग्रेसले अभियानका लागि १६५ वटै निर्वाचन क्षेत्रमा केन्द्रीय नेताहरूलाई प्रतिनिधिका रुपमा खटाएको थियो । प्रतिनिधिहरूलाई आफ्नो क्षेत्रका विषयमा लिखित प्रतिवेदन बुझाउन भनिएको छ । प्रतिनिधिका रुपमा खटिएका नेताहरूले केन्द्रीय कार्यालयमा प्रतिवेदन बुझाएपनि देशभर पार्टीको अवस्था कहाँ कस्तो छ भन्ने बारे केन्द्रीय कार्यालयमा अपडेट हुनेछ । आन्तरिक अभियानको समीक्षापछि अर्को चरणको संगठन सुदृढीकरण अभियान प्रारम्भ गर्ने कांग्रेसको तयारी छ ।