काठमाडौं महानगरले सुरु गर्यो डेंगीको लार्भा नष्ट गर्न जैविक औषधि छर्कने अभियान

५ भदौ, काठमाडौं । काठमाडौं महानगरपालिकाले डेंगी रोग फैलन नदिन लाम्खुट्टेको लार्भा नष्ट गर्न औषधि छर्कने कार्यक्रम सुरु गरेको छ । महानगरले आफ्नो क्षेत्रभित्र मंगलबार वायो लार्भिसिद (Boi Larvicid) छर्कन सुरु गरेको हो । यो जैविक औषधी हो ।

यो नेपालमै पहिलोपटक प्रयोग गर्न लागेको महानगरका मेयर बालेन साहले जानकारी दिएका छन् । यो औषधिले  लामखुट्टे र त्यसका लार्भालाई बाहेक कसैलाई पनि असर नगर्ने समेत उनले बताएका छन् । औषधिले डेंगीसहित, फिलारिया, औलो (मलेरिया), चिकन्नीयाजस्ता रोग फैलाउने सबै प्रजातिका लामखुट्टेका लार्भा र प्युपा नष्ट हुने जनाइएको छ । औषधी छर्कन पम्प र स्प्रे पाइसहित ठूलाे संख्यामा टाेली परिचालन गरिएकाे छ ।

कसरी प्रयोग गर्ने ?
महानगरले औषधि छर्कने विधिबारे पनि जानकारी दिएको छ । महानगरले कार्य क्षेत्रमा खटिने टोलीलाई प्रशिक्षण दिइसकेको छ । जसअनुसार औषधिलाई पानीको माथिलो भागमा छर्कनु पर्नेछ । यसले लार्भाको पेटमा विष उत्पन्न गर्ने यसबाट उसको पाचन प्रक्रिया नष्ट हुनने जनाइएको छ । यसबाट पूर्ण विकसित हुन नपाउँदै लार्भा मर्छ ।   

परामर्श सेवाका लागि हटलाइन नम्बर

यस्तै डेङ्गी रोगको बारेमा परामर्श दिन निःशुल्क हटलाइन टेलिफोन सेवा समेत सुचारु गरिएको छ । त्यसनिम्ति ११८० नम्बरमा २४ सै घण्टा फोन गरेर डेंगीबारे जानकारी दिन सकिने महानगरले जनाएको छ । 

डेंगीका बिरामीले अस्पताल जानु परे १०२ नम्बर सम्पर्क गरेर निःशुल्क एम्बुलेन्स प्रयोग गर्न सक्ने व्यवस्था मिलाइएको छ । स्वास्थ्य प्रवर्द्र्धन केन्द्रहरुमा डेंगी रोगको उपचारका लागि चाहिने सिटामोल, जीवन जल लगायत आवश्यक औषधिको वितरणको व्यवस्था मिलाइएको छ ।