मेरो छायाँ देखेर एमाले राष्ट्रपतिले बोलाएको सर्वदलीय बैठकमा आएन : माधवकुमार नेपाल

५ भदौ, काठमाडौं । नेकपा एकीकृत समाजवादीका अध्यक्ष माधवकुमार नेपालले राष्ट्रपतिले बोलाएको सर्वदलीय बैठकमा आफ्नो छायाँ देखेर नेकपा एमाले नआएको बताएका छन् । 

नेकपा एसको मंगलबारबाट शुरु भएको केन्द्रीय कमिटी बैठकमा अध्यक्ष नेपालले  एमाले संकीर्ण पार्टी भएको आरोप पनि लगाए । उनले भने ‘ राष्ट्रपतिले बोलाएको सर्वदलीय बैठकमा म पनि गएको थिए । थाहा छैन मलाई किन हो एमालेका नेताहरु आएनन् । सम्भवत त्यहाँ माधव नेपालको छाँया परेको हुनाले होला उहाँहरु आउनु भएन् । 

अध्यक्ष नेपालले आफुहरुमा त्यस्तो खालको संकीर्णता र सानो चित्त पनि नभएको बताए । आफुहरु सबैको मान राख्दै सबै साँझा विषयबस्तुहरुमा हातेमालो गर्दै अगाडि बढ्न चाहेको नेपालको भनाइ थियो ।