वृक्षरोपणमा अवरोध खेपेका मेयर हर्क साम्पाङ पुगे प्रहरीकहाँ

६ भदौ, काठमाडौं । धरान उपमहानगरपालिकाका मेयर हर्क साम्पाङ राईले वृक्षारोपण गर्न जाँदा आफूमाथि दुर्व्यवहार गरेको भन्दै एक दम्पत्तिविरुद्ध प्रहरीमा उजुरी दिएका छन् । 

गएको साउन ६ मा धरान–४ स्थित राई टोलीसहित सर्दु जलाधार क्षेत्रमा पुगेर वृक्ष रोपण गरेका थिए । त्यसक्रममा व्यक्तिको जग्गा भएको भन्दै रोशन अधिकारी र रोजिना अधिकारीले मेयर राईमाथि हातपात र दुर्व्यवहार गरेको विषयमा उनले ति दुई जनाविरुद्ध उजुरी दिएका हुन् । 

मेयर राईले अधिकारी दम्पत्तिविरुद्ध किटानी जाहेरी दिएको जिल्ला प्रहरी कार्यालय सुनसरीका प्रमुख प्रभु ढकालले बताए । उजुरीमा नाम उल्लेख भएका व्यक्तिलाई कानुनी दायरामा ल्याउने तयारी प्रहरीले गरेको छ । राईले आफूमाथि भएका दुर्व्यवहारको भिडियो समेत बुझाएको बताइएको छ ।

राईले वृक्षरोपण गरिएको जग्गा सार्वजनिक रहेको र अधिकारी परिवारले हडपेर भोगचलन गरिरहेको दाबी गरेका छन् । विवाददित जग्गा तत्कालीन बाँझगरा गाविस–९ को किञ नं. ४२१ र ३४५ रहेको र उक्त जग्गा लामो समयदेखि अधिकारी परिवारले चलाउँदै आइरहेको बताइन्छ । जग्गा आफ्नो भन्दै अधिकारीबाट परेको मुद्दामा उच्च अदालत विराटनगरले अन्तिम टुंगो नलागेसम्म अधिकारीले भोग चलन गरिरहेको जग्गामा प्रवेश नगर्न अल्पकालीन आदेश जारी भएको अधिकारी पक्षको दाबी छ । 

उजुरी परेपछि अधिकारी दम्पत्ति फरार भएका छन् । फरार भएपछि राईले बुधबार सामाजिक संजालमा ‘कति दिन फरार हुने हो र ? ६ महिनासम्म ?’ भनेर सामाजिक संजालमा लेखेका छन् ।