लगानी बोर्डले गर्याे ४ वटा जलविद्युत् आयोजनाका ३६ अर्ब लगानी स्वीकृत

८ भदौ, काठमाडौं । प्रधानमन्त्री अध्यक्ष रहेको राष्ट्रिय लगानी बोर्डको आज बसेको बैठकले ४ वटा जलविद्युत् आयोजनाका लागि ३६ अर्ब ३७ करोड रुपैयाँ लगानी स्वीकृत गरेको छ ।

प्रधानमन्त्री ‘प्रचण्डको अध्यक्षतामा शुक्रबार बसेको बोर्डको ५५औं बैठकले रोल्वालिङ खोला, छुजुङ्ग खोला, दाना खोला र सानीभेरी जलविद्युत् परियोजना गरी जम्मा ३६ अर्ब ३७ करोड रुपैयाँ बराबरको लगानी स्वीकृत गरेको हो ।

साथै तमोर जलाशययुक्त जलविद्युत परियोजना कार्यान्वयन अघि बढाउने सम्बन्धमा भावी कार्यदिशासम्बन्धी सुझाव पेश गर्न उच्चस्तरीय समिति गठन गर्ने निर्णय भएको छ । 

त्यस्तै, बैठकले दुई वटा इनर्जी कम्पनीलाई सौर्य ऊर्जाको विश्स्कृति संभाव्यता अध्ययन अनुमतिपत्र दिने निर्णय भएको छ । डोल्मा हिमालयन इनर्जीलाई दाङको राजपुर गाउँपालिकामा २४५ मेगावाट र २० मेगावाट ब्याट्री​ क्षमताको सौर्य ऊर्जा परियोजनाको अध्ययनका लागि अध्ययन अनुमतिपत्र दिने निर्णय गरेको छ । 

बाँकेको कोहलपुर र कपिलवस्तुको वाण गंगामा २५० मेगावाटको सौर्य ऊर्जा विकासका लागि अध्ययनकर्ता रिसेन इनर्जी कम्पनी लिमिटेडबाट पेस भएको विस्तृत सम्भाव्यता अध्ययन प्रतिवेदनलाई बुझ्ने निर्णय गरेको छ ।

बोर्डले माथिल्लो कर्णाली जलविद्युत् परियोजनाबारे सर्वोच्च अदालतबाट जारी भएको निर्देशनात्मक आदेश कार्यान्वयनका लागि मन्त्रिपरिषद्समक्ष प्रस्ताव पेश गर्ने निर्णय गरेको छ । 

साथै ग्रिन क्यालसियम एम्मोनियम निटरेट (क्यान) फर्टिलाइजर फ्याक्ट्री स्थापनाको अध्ययनका लागि मलेसियास्थित रेनिकोला एसडीएन बीएचडीसँग गरिने समझदारीको मस्यौदालाई स्वीकृत गरेको छ ।