बेपत्ता आयोग र मेलमिलाप आयोगसम्बन्धी विधेयक राष्ट्रियसभामा पेस

१० भदौ, काठमाडौं । राष्ट्रियसभामा बेपत्ता नागरिक खोजबिन तथा छानबिन आयोग र सत्य निरुपण तथा मेलमिलाप आयोगसम्बन्धी विधेयक पेस गरिएको छ । 

राष्ट्रियसभा आइतबार बसेको बैठकमा कानून, न्याय तथा संघीय मामिला मन्त्री धनराज गुरुङले विधेयक पेस गरेका हुन् । सरकारको मन्त्रिपरिषदको गत असार १९ गते बसेको बैठकले दुवै अयोगको म्याद आगामी पुस मसान्तसम्म बढाउने निर्णय गरेको थियो । त्यसनिम्ति मन्त्रिपरिषद्ले आयोगको ऐन २०७१ को केही दफा संशोधन गर्ने निर्णय गरेको थियो । 

ऐनलाई संशोधन गर्न तयार पारिएको विधेयकलाई छलफलका लागि आजको बैठकमा पेस गरिएको हो । साउन २ मा भएको सुन तस्करी प्रकरणलाई लिएर प्रमुख प्रतिपक्ष एमालेले लामो समय बैठक चल्न नदिँदा विधेयकमाथि छलफल राकिएको थियो । 

आगामी बैठकमा विधेयकमाथि छलफल हुनेछ । बैठक यही भदौ १८ गते दिउँसो १ बजेर १ मिनेटमा बस्ने गरी सभाध्यक्ष गणेशप्रसाद तिमिल्सिनाले स्थगित गरेका छन् ।