प्रदेश र संघीय सरकारको सम्बन्ध अब झन् मजबुत : प्रधानमन्त्री प्रचण्ड

१० भदाै, काठमाडौं । प्रधानमन्त्री पुष्पकमल दाहाल प्रचण्डले सम्बृद्धि र सुशासनको नयाँ यात्रामा जानुको कुनै विकल्प नभएको बताएका छन् । आइतबार ललितपुरको भैंसेपाटीमा मुख्यमन्त्री कार्यालय भवन उद्घाटन कार्यक्रममा उनले सुशासन सामाजिक न्याय र सम्बृद्धिको राष्ट्रिय उद्देश्यमा सरकार अगाडी बढेको भन्दै त्यसको यात्रामा जानुको कुनै विकल्प नरहेको बताएका हुन् ।

उनले भने, ‘सुशासन सामाजिक न्याय र सम्बृद्धिको राष्ट्रिय उद्देश्य हाम्रो नयाँ सरकारले भनेको छ र त्यसमा अगाडी बढ्दै छ । त्यसमा सबै प्रदेशहरुको पनि सहयोग अझै राम्रसँग हुने छ । भन्ने विश्वास व्यक्त गर्न चाहान्छु ।  हामीलाई स्थिरता स्थायित्वको साथै सम्बृद्धि र सुशासनको नयाँ यात्रामा जानुको कुनै विकल्प हामी नेपालीहरुको अगाडी छैन् ।’ 

काठमाडौं उपत्यकामा प्रदेश प्रमुख र मुख्यमन्त्रीहरूको आवासगृह तयार भएसंगै संघीय मन्त्रीहरूको क्वाटर पनि केहि महिनाभित्रमा टुङ्गिने प्रधानमन्त्री प्रचण्डले बताए ।  प्रत्येक प्रदेशका लागि एउटा भवन रहेको छ र त्यसमा प्रदेश प्रमुख र मुख्यमन्त्रीका लागि छुट्टाछुट्टै ब्लक रहेको छ । भवन हस्तान्तरण गर्दै प्रधानमन्त्री प्रचण्डले प्रदेश र संघीय सरकारको सम्बन्ध अब झन् मजबुत हुने बताए । 

सरकारी आवास तयार भएपछि प्रदेश प्रमुख र मुख्यमन्त्रीहरू काठमाडौं आउँदा यिनै भवनमा बस्न पाउने भएका छन् । करिब ८५ करोड रुपैयाँ लागतमा भवन तयार भएको आयोजना प्रमुख मचाकाजी महर्जनले बताए ।  अब भवनमा मुख्यमन्त्री र प्रदेश प्रमुख आफ्नो सम्पर्क कार्यालय समेत राख्न सक्नेछन् । हाल प्रदेश प्रमुख र मुख्यमन्त्रीहरू काठमाडौं आउँदा बस्ने गरी सरकारले अपार्टमेन्टमा भाडामा लिएको छ ।