ठूला भ्रष्टाचार काण्डलाई सामसुम पार्ने खतरा देखियाे : गगन थापा

११ भदौ, काठमाडौं । संघीय सांसद एवं नेपाली कांग्रेसका महामन्त्री गगन थापाले ठूला भ्रष्टाचार काण्डलाई सामसुम पार्ने कोसिस भइरहेको भन्दै खबरदारी गर्न सबै एकजुट हुनुपर्ने बताएका छन् । छानबिन गर्नुपर्ने पक्षका सबै एक ठाउँमा उभिन पनि अपिल गरेका छन् ।

सोमबार सामाजिक सञ्जाल फेसबुकमार्फत उनले सामसुम पार्ने खतरा र मिलेमतोलाई तोड्न पार्टीभित्र र बाहिर सहकार्यका लागि उनले प्रस्ताव राखेका छन् । उनले ललितानिवास, नक्कली भुटानी शरणार्थी, सुन तस्करी, टीकापुर जग्गा घोटालाजस्ता काण्डहरू सार्वजनिक भइरहँदा पनि सरकार नसुने झैं गरिरहेको बताए । ठूला सबै घटना सामसुम जिम्मेवार व्यक्तिहरू लागेको उनको आरोप छ । 

‘यस्ता घटना सामसुम पार्न उनीहरू मिल्छन् भने यस्ता घटनामा छानबिन गर्न गराउन हामी किन नमिल्ने ? विगतमा जस्तै एउटै पार्टीभित्र समान धारणा भएको एक ठाउँमा आऔँ, यस्तै धारणा भएको अन्य पार्टीका साथीहरूसँग पनि समान धारणा बनाऔं, अनि पार्टी बाहिरको नागरिक आन्दोलनसँग एकाकार होऔं’ थापाले लेखेका छन् ।