टिकटक बन्द गराउन माग गर्दै संचार मन्त्रीलाई निवेदन

१२ भदौ, काठमाडाैं । सामाजिक संजाल टिकटक बन्द गराउन माग गर्दै संचार तथा सूचना प्रविधि मन्त्रालयमा निवेदन दिएका छन् । नेपाल समाजवादी मोर्चाका संयोजक युवराज पौडेलले निवेदन दिएका हुन् ।

उनले मल्टिमिडिया मोबाइल एप टिकटक तत्काल बन्द गराउन माग गरेका छन् । टिकटक नेपालभित्र बिना अनुमति चलाइएको र यसबाट धार्मिक, जातीय तथा अनैतिक क्रियाकलापलाई समेत बढवा दिइरहेको भन्दै बन्द गर्नुपर्ने तर्क सारेका छन् । 

टिकटकको माध्यमबाट समाजमा छाडातन्त्र, गालीगलौज, मानहानी, अश्लीलता, वेश्यावृत्ति र अपराधजन्य घटना वृद्धि भएको विवरण उनले मन्त्रीलाई सम्बोधन गरेर प्रेषित निवेदनमा उल्लेख छ । कानून बनाएर मात्र टिकटक चल्न दिनुपर्ने उनको भनाइ छ । 

नक्कली आईडी बनाएर असामाजिक किसिमका भिडियो पोष्ट गर्ने, टिकटक मार्फत गेम चलाएर पुरस्कार वितरण गर्ने तर राजश्व नतिर्ने अवस्थाले राज्यलाई नै चुनौति रहेको भन्दै त्यस्ता व्यक्तिहरुलाई तत्काल राजश्वको दायरामा ल्याउनुपर्ने बताइएको छ । 

बन्द नगरिए सामाजिक सदभावमा समेत खलल ल्याउने खतरा बढेको विषय मन्त्रीकाे सचिवालयमा दिइएकाे  निवेदनमा औल्याइएकाे छ । संचार मन्त्री रेखाकुमारी शर्मा छिन् ।