पाकिस्तानसँगकाे खेल लगत्तै श्रीलंका पुग्याे नेपाली राष्ट्रिय क्रिकेट टिम

१४ भदाै, काठमाडाैं । एसिया कप २०२३ अन्तर्गत समूह चरणको आफ्नो दोस्रो खेलका लागि नेपाली राष्ट्रिय क्रिकेट टिम श्रीलंका पुगेको छ । बुधबार आफ्नो पहिलो खेलमा नेपाल पाकिस्तानसँग २ सय ३८ रनले पराजित भएको थियो ।

सो खेल लगत्तै नेपाली क्रिकेट टोली चार्टर फ्लाइटमा श्रीलंकातर्फ लागेको हो । नेपालले भारतसँग भदौ १८ मा खेल्नेछ । खेल श्रीलंकाको क्यान्डीमा हुनेछ । समूह ‘ए’ को बाँकी खेल खेल्न पाकिस्तान र नेपाली टोली बिहीबार बिहान ३ बजे एउटै चार्टर फ्लाइटमा कोलोम्बोतर्फ लागेका हुन् । नेपाली टोलीलाई श्रीलंका क्रिकेटले स्वागत गरेको थियो ।

पाकिस्तानले आफ्नो चीर प्रतिद्वन्द्वी भारतविरुद्ध शनिबार क्यान्डीमा खेल्दै छ । प्रतियोगितामा भारतको यो पहिलो खेल हुनेछ । त्यसको दुई दिनपछि भारतले क्यान्डीमा नेपालविरुद्ध खेल्ने छ । क्यान्डीमा हुने यी दुवै खेल वर्षाले प्रभावित हुने सम्भावना देखिएको छ ।

बाबर आजमको १ सय ५१ र इफ्तिखार अहमदले अविजित १ सय ९ रन बनाएपछि पाकिस्तानले एसिया कपको उद्घाटन खेलमा नेपालविरुद्ध ६ विकेट गुमाई ३ सय ४२ रन बनाएको थियो । नेपाल २४ ओभरभित्र १ सय ४ रनमा अलआउट भएको थियो । नेपालमाथिको ठूलो विजयले पाकिस्तानको सुपर फोरमा पुग्ने सम्भावना बलियो बनिसकेको छ ।