शनिबार काठमाडौं र ललितपुरका केही क्षेत्रमा बिहान १० देखि साँझ ६ बजेसम्म विद्युत प्रभावित हुने

१५ भदौ, काठमाडौं । नेपाल बिद्युत् प्राधिकरणले शनिबार काठमाडौं र ललितपुरका केही भागमा विद्युत आपूर्ति अवरुद्ध हुने जनाएको छ । सब स्टेसन मर्मतका कारण काठमाडौं र ललितपुरका केही स्थानमा शनिबार करिब साढे ८ घण्टासम्म विद्युत आपूर्ति बन्द हुनसक्ने नेपाल विद्युत प्राधिकरणले जनाएको छ ।

ललितपुरका पुल्चोक र लगनखेल वितरण केन्द्र अन्तर्गत पर्ने फिडरहरुबाट आपूर्ति हुँदै आएको बिजुली शनिबार बिहान १० बजेदेखि साँझ ६ः३० बजेसम्म प्रभावित हुनेछ । प्राधिकरणले वैकल्पिक व्यवस्था गरिएपनि विद्युत प्रभावित हुनसक्ने बताएको हो । 

काठमाडौंका रत्नपार्क र कुलेश्वर तथा टेकु सब स्टेसनको स्तरोन्नति गरी टेकु–स्युचाटार ६६ केभी लाइन १३२ केभीमा चार्ज गर्ने कार्य भइरहेकाले विद्युत आपूर्ति प्रभावित हुने प्राधिकरणले जनाएको छ ।

प्राधिकरणले जारी गरेको सूचनामा लेखिएअनुसार विद्युत आपूर्ति सकेसम्म कम प्रभावित होस् भनेर सबै फिडरहरुमा वैकल्पिक व्यवस्था समेत गरिएको छ ।