ओलीसँगकाे भेटमा अमेरिकी सिनेटर होलेनले देखाए शान्ति प्रक्रिया टुंगाेमा पुर्याउने बारे चासाे

१७ भदौ, काठमाडौं । प्रमुख प्रतिपक्ष नेकपा (एमाले) का अध्यक्ष केपी शर्मा ओली र नेपाल भ्रमणमा रहेका अमेरिकी सिनेटर क्रिस भान होलेनबीच आज भेटवार्ता भएको छ । 

एमाले संसदीय दलको कार्यालय सिंहदरबारमा आज दिउँसो भेटवार्ता भएको हो । भेटमा होलेनले गत बुधबारबाट नेपालमा कार्यान्वयनमा गएको एमसीसी सम्झौताबारे चासो राखेका थिए । सम्झौता कार्यान्वयन प्रवेश विवादमा परेको बेला शुक्रबार नेपाल आइपुगेका होलेनले ओलीसँग चासो राखेका हुन् । 

भेटमा एमसीसी सम्झौता कार्यान्वयन, शान्ति प्रक्रिया टुंगाेमा पुर्याउन बाँकी विषय, दुई देश बीचको सम्बन्ध विस्तार र सहयोग आदान प्रदानका सम्बन्धमा चासोका साथ कुरा गरेको एमाले संसदीय दलका उपनेता सुवासचन्द्र नेम्वाङले बताए । 

जवाफमा पूर्व प्रधानमन्त्री समेत रहेका ओलीले आफू सम्झौता कार्यान्वयनको पक्षमा सधैं उभिने र अन्य सहयोगको अपेक्षा राखेको बताएको नेम्वाङले बताए । शान्ति प्रक्रिया नेपालले मौलिक तरिकाबाट टुंगोमा पुर्याउने आश्वासन ओलीले दिएका थिए ।