राज्यले खेलाडीमाथि शोषण गरिरहेको छ : सांसद ढकाल

१८ भदौ, काठमाडौं । राष्ट्रिय स्वतन्त्र पार्टी (रास्वपा)का सांसद हरि ढकालले राज्य र सरकार मिलेर नेपाली खेलाडीको शोषण गरिरहेको बताएका छन् ।

सांसद ढकालले सोमबार प्रतिनिधिसभाको बैठकमा विशेष समयमा बोल्दै सांसद अधिकारीले आज एसिया कप क्रिकेट प्रतियोगितामा नेपाली टिमले शक्तिशाली भारतीय टिमसँग खलिरहेको अवस्थामा पनि खेलाडीले राष्ट्रियताको पक्षमा उच्च मनोबल देखाइरहेको बताए । 

आर्थिक समस्याबीच उच्च मनेबलसहित मैदान उत्रिँदै गरेका नेपाली क्रिकेट टिमलाई सरकारले बधाइ दिएर मात्र नपुग्ने उनले बताए । खेलाडीलाई राज्यले ए, बी र सी श्रेणीमा वर्गीकरण गरेर सेवा र सुविधामै पक्षपात गरेको बताए । उनले क्रिकेट मात्र नभई हरेक खेलमा न्यून सुविधा दिएर राष्ट्रिय खेलाडीमाथि शोषण गरेको उनको आरोप छ । सरकारले खेलाडीलाई शुभकामना दिएर मात्र नहुने भन्दै सुविधा र खेल्ने मैदान दिनुपर्ने बताए ।

भारतले क्रिकेटमा ‘ए’ ग्रेडका खेलाडीलाई १ करोड ५ लाख आईसी दिएको तर नेपालले जम्मा ६० हजार रुपैयाँ दिएर अपमान गरेको बताए । उनले मुलुकलाई अन्तर्राष्ट्रिय क्षेत्रमा चिनाउने गरी खेल खेल्ने खेलाडीलाई सुविधा र खेल्ने मैदानमा लगानी नगरी प्रदेश प्रमुखहरु काठमाडौं आउँदा सुत्नका लागि अर्बौं रुपैयाँ खर्चेर विशाल भवनहरु बनाएको भन्दै आलोचना गरे । 

भारतसँगको खेलमा नेपाली टिमलाई जितको शुभकामना दिँदै उनले क्रिकेटको माध्यमबाट अन्तर्राष्ट्रिय नेपाललाई चिनाएकोमा आफ्नो तर्फबाट ‘स्यालुट’ गर्न चाहेको बताए । 

उनका पार्टी सभापति रबि लामिछाने खेलाडीलाई हौसला प्रदान गर्न भन्दै आइतबार नै श्रींलका पुगिसकेका छन् । एसिया कपका लागि खेल श्रीलंका र पाकिस्तानमा भइरहेको छ । भारत खेल खेल्न पाकिस्तान नजाने भएपछि श्रीलंकामा आयोजना गरिएको हो । भारत र पाकिस्तानबीचको खेल पनि श्रीलंकामा नै हुँदैछ ।