गिरीबन्धु टी इस्टेट प्रकरणमाथि तत्काल छानबिन गर्न सांसद खतिवडाको माग

८ भदौ, काठमाडौं । सत्तारुढ नेपाली कांग्रेसका नेता एवं संघीय सांसद रामहरि खतिवडाले झापाको गिरीबन्धु टी इस्टेट प्रकरणबारे तत्काल छानबिन गर्न सरकारसँग माग गरेका छन्। 

सोमबार प्रतिनिधिसभा बैठकको शून्य समयमा बोल्दै उनले सो प्रकरणमा ठूलो भ्रष्टाचार भएको जिकिर गर्दै सरकारले तत्काल छानबिन गरी दोषीलाई कारबाही गर्नुपर्नेमा जोड दिए । 
सरकारी स्वामित्वको गिरिबन्धु टी स्टेटको ३४२ बिगाह तत्कालीन एमाले नेतृत्वको सरकारले कानून संशोधन गरेर व्यक्तिको नाममा पुर्याएको भन्दै छानबिनको माग हुँदै आएको छ । 

काठमाडौंको बालुवाटारको सरकारी स्वामित्वको ललितानिवासको १४३ रोपनी जग्गा कीर्ते गरेर व्यक्तिको नाममा गराएको आरोपमा हाल भाटभटेकी सुपर मार्केटका मालिक मिनबहादुर गुरुङसहित ३ सय भन्दा बढी व्यक्तिहरुविरुद्ध काठमाडौं जिल्ला अदालतमा मुद्दा चलिरहेको छ । 

साेही क्रममा सांसद खतिवडाले काठमाडौं महानगरका मेयर बालेन साहको सामाजिक संजालमा व्यक्त रुखो सन्देशप्रति लक्षित गर्दै जनप्रतिनिधिहरुलाई जथाभाबी नबोल्न समेत सचत गराए । जनताबाट जितेर आएका जोकोहीले सार्वजनिक अभिव्यक्ति दिँदा ख्याल गर्नुपर्ने बताए ।