हामी कि बिजुली बेच्दैनौं भन्नुपर्यो, नत्र भारतको कुरा मान्नुपर्ने हुन्छः सभापति देउवा

१९ भदौ, काठमाडौं । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले नेपाल भारतसँग बिजुली बेच्न बाध्यकारी सर्तमा परेको बताएका छन् ।

मंगलवार काठमाडौंमा पार्टीनिकट नेपाल निजामती कर्मचारी युनियन केन्द्रीय कार्यसमितिले नेपाल निजामती कर्मचारी युनियनको स्थापना दिवसको अवसरमा आयोजना गरेको कार्यक्रमलाई सम्बोधन गर्दै नेपालसँग विद्युत किन्ने भनेको भारत मात्रै भएकाे बताए । 

उनले नेपालले कि विद्युत नै बेच्दिन भन्नुपर्ने, नत्र भारतले भनेका कुराहरुमा सहमति जनाएर अगाडि बढनुपर्ने बताए । भारत र चीन नेपालको असल छिमेकी रहेको र दुवैसँग बुद्धिमता तवरले सन्तुलन कायम राख्नुपर्ने बाध्यतामा नेपाल रहेको बताए । विकासका काममा ठूलो दुई छिमेकी देशलाई बुझाएर नेपालले अघि बढ्नुको विकल्प नरहेको उनको भनाइ छ । 

सभापति देउवाले नेपालमा बिजुली उत्पादनको संभावना प्रचुर रहेको र त्यसलाई छिमेकीलाई बेचेर व्यापार घाटा कम गराउनु आजको मुख्य आवश्यकता रहेको बताए । ‘हामी कि बिजुली बेच्दै बेच्दैनौँ भन्नुपर्यो, नत्र उसको कुरा मान्नुपर्ने हुन्छ, त्यही कुरा हो । सबैले बुझ्नुपर्छ’ उनले भने ।